Қала әкімі баспасөз қызметінің мәліметінше, бүгінде облыс орталығында тазалық жұмыстары жүйелі түрде жолға қойылған. Осыған дейін жылдық жоспарға сәйкес, тазалық жұмыстары аясында аймақта «Таза Қазақстан» бағдарламасы шеңберінде 37 іс-шара ұйымдастырылған. Оның ішінде 7 сенбілік пен 30 экологиялық акция бар. Бұл іс-шараларға жалпы 5 700-ден астам еріктілер мен жастар, ПИК өкілдері және аймақ тұрғындары қатысқан. Атқарылған тазалық жұмыстары негізінен қаладағы Қаратал өзенінің жағалауында, арықтарда, ескерткіштер мен қоғамдық орындарда жүргізіліп, 650 тоннадан астам күл-қоқыс шығарылған.
– Тазалық әр тұрғынның ортақ жауапкершілігі. Біз барлығымыз бірге атсалысып, қаламызды таза әрі көрікті ете аламыз. Бұл бағыттағы жұмыстар тек бір реттік емес, жүйелі түрде жалғасатын болады. «Таза Қазақстан» аясындағы шаралар экологияны қорғауға, тұрмыс сапасын арттыруға және тұрғындар арасында қоршаған ортаға ұқыпты қарау мәдениетін қалыптастыруға бағытталған. Алдағы уақытта да сенбіліктер мен экологиялық акцияларды кеңінен ұйымдастырылып, әрбір азаматтың белсенді қатысуына мүмкіндік беріледі, – дейді қала әкімінің орынбасары Қуаныш Сейтімбетов.
Жауаптылардың сөзінше, бүгінде Жетісу облысының орталығында шаһар тазалығына 900-ден астам жұмысшысы бар 8 кәсіпорын жауапты. Бұдан бөлек аймақта «Таза Қазақстан» акциясы аясында «Таза Сәрсенбі», «Таза Бейсенбі», «Сенбілік» тағы басқа да тазалық шаралары жиі өтеді. Мұндай кезде қатысқан адамдардың барлығы тиісті құрал-саймандармен толық қамтылып, жүк көліктерімен басқа да техникалар жұмылдырылады. Қазіргі кезде аймақта жасыл желектер суару, ағаштарды санитарлық мақсатта кесу мен бірге арық желілері тазартылып, шөп шабу жұмыстары жүргізілуде. Сондай-ақ, осы барыста жол жиектері, саябақтар, скверлер мен аялдамалар тегіс ретке келтіріліп, тазартылуда.
Айдын КӘЛІМХАН
