Ақордада өткен жиында Ішкі істер министрі Ержан Сәденов, Ұлттық қауіпсіздік комитетінің төрағасы Ермек Сағымбаев, Денсаулық сақтау министрі Ақмарал Әлназарова және Қаржылық мониторинг агенттігінің төрағасы Жанат Элиманов баяндама жасады.
Қасым-Жомарт Тоқаевтың айтуынша, елімізде де, әлемде де наркотизм мәселесі алаңдатарлық деңгейге жетті.
– Наркотизм – заманның дерті, қоғам үшін аса қауіпті. Ол жастардың болашағына балта шабады, ұлт саулығына қатер төндіреді. Көптеген елдің үкіметтері бұл проблеманы тек физикалық және психикалық тәуелділік емес, сонымен қатар ауқымды қоғамдық, экономикалық және құқықтық құбылыс ретінде қарастырады, – деді Мемлекет басшысы.
Сарапшылардың пікірінше, «наркотизм» ұғымы нашақорлықтан әлдеқайда кең, ол ұлттық қауіпсіздік, әлеуметтік және экономикалық мәселелермен тікелей байланысты.
Президент есірткіге тәуелді жандардың басым бөлігі қоғам тарапынан айыптаудан қауіптеніп, дер кезінде көмекке жүгінбейтінін атап өтті. Осы орайда ол емдеу-сауықтыру шараларын кеңейту, статистикалық деректерді жинау мен талдауды жетілдіру, сондай-ақ химиялық заттардың таралуын бақылауды күшейтуді тапсырды.
Мемлекет басшысы интернет пен медиа индустрияда есірткі мен ішімдік ішуге қатысты жағымсыз насихаттың белең алуына алаңдаушылық білдірді.
Жиында есірткі айналымымен байланысты құқық бұзушылықтың алдын алу, анықтау және жазалау тетіктерін жетілдіру мәселесі талқыланды. Тоқаев кез келген есірткі түрінің өндірісі мен сатылымына қатаң тыйым салынуы және мемлекеттің қатаң бақылауында болуы тиіс екенін айтты.
Сондай-ақ ол трансұлттық ұйымдасқан қылмысқа, есірткі сататын орындар мен жасырын зертханаларға қарсы іс-қимылды күшейтуді, күмәнді қаржы операцияларын қатаң бақылауға алуды тапсырды.
Жиын соңында Президент Үкіметке, өңір әкімдеріне және құқық қорғау органдарына нашақорлықтың алдын алу және есірткі бизнесіне қарсы іс-шараларды күшейту жөнінде нақты тапсырмалар берді.
