Ақсу өңірі – дарынды да дара тұлғаларымен мақтана алатын қасиетті мекен. Солардың бірі – елге еңбегімен елеулі, абыройымен ардақты, ақыл-парасатымен сыйлы Ақсу ауданының Құрметті азаматы Мейірман Тілеуберлинов.
Мейірман Тілеуберлинов 1950 жылы Ақсу ауданының Діңгек ауылында дүниеге келіп, ата-анасының өнегелі тәрбиесімен ержетті. Балалық шағы «Ақсу» қой кеңшарында өтті. Алғашқы білімін Ащыбұлақ ауылындағы Мәншүк Мәметова атындағы мектепте алып, кейін Ю. Гагарин атындағы орта мектепті тамамдайды.
Жастайынан еңбекке араласқан ол кеңшарда жұмыс істеп жүріп спортпен де айналысты. КСРО Спартакиадасының күміс жүлдегері Ғалымжан Атабаевтың тәрбиесі жас жігіттің бойындағы жеңіске деген ұмтылысты оятты. Осы жол Мейірман ағаны үлкен спортқа, жеңістер мен жетістіктерге жетеледі.
Ол 1969 жылы Абай атындағы Қазақ мемлекеттік педагогикалық институтының физика факультетіне оқуға түсіп, «инженер-физик» мамандығын алып шығады. Студенттік жылдары еркін күреспен кәсіби деңгейде шұғылданып, Алматы қаласының чемпионы, республикалық жарыстардың жеңімпазы, КСРО спорт шебері атанады. Еліміздің еркін күрестен жастар құрамасына мүше болып, халықаралық додаларда ел намысын қорғады. Аталмыш күрес түрінен спорт шебері дәрежесіне көтеріліп, Қазақстан Республикасының құрама командасының мүшелігіне өтті.
Жоғары оқу орнын бітіргеннен кейін алғашқы еңбек жолын Зылиха Тамшыбаева басқарған Еңбекші ауылында бастады. Ол өзінің еңбекқорлық, біліктілігімен ерекшеленді. Жігерлі жас қандай шаруаға да бейімді екенін танытты. Шаруашылық басшысына аудан атқамінерлерінен елгезек, тыңғылықты азаматты мемлекеттік қызметке ауыстыру туралы ұсыныс түсті. Бірнеше айдан кейін ол Қапал ауданына шақыртылып, ауданда ашылған алғашқы спорт мектебіне жетекшілік етті. Маман өзін мықты ұйымдастырушы, талапшыл басшы ретінде танытты. Сөйтіп ұйымдастырушы, көшбасшы, қайраткерлік жолға аяқ басты.
Оқу бітірген соң ұстаздық қызметке кірісіп жаттықтырушы, мектеп мұғалімі, аудандық спорт комитетінің төрағасы, аудандық партия комитетінің идеология саласындағы жетекші кадр, тұрмыс қажетін өтеу комбинатының директоры секілді жауапты лауазымдарды абыроймен атқарады. Еркін күрестен ересектер арасында еліміздің құрама командасында екі жыл мүше болды.
Ақсу және Ескелді аудандарының «Құрметті азаматы». Ескелді ауданында 15 жыл қажырлы еңбек етті. Талдықорған ауданының атын Ескелді ауданына аударуға елеулі үлес қосты Бұл мәселені сол кездегі аудан әкімі Болатби Құтпанов және аудан белсенділері Наурыз Қылышбаев, Болысбек Тазабеков, Сабит Биболовтармен ақылдаса келіп, Ескелді би атамыздың атын берейік деген шешім шығарды. Барлық округтерде жиналыс өткізіп, хаттамасын толтырып, ұсыныстарын жинап, үкіметке хат жолдады.
Еліміз тәуелсіздік алғаннан кейінгі ауыр кезеңде де Мейірман Тілеуберлинов ел үшін маңызды істердің басы-қасында жүрді. Қапал ауданы әкімінің орынбасары, кейін бірінші орынбасарлығына көтерілді. Ол ауыл халқының тұрмысын жақсарту, жаңа басқару жүйесін ұйымдастыру, әкімшілік реформаларды тиімді жүзеге асыру жолында өлшеусіз еңбек етті.
Ауданның әлеуметтік-экономикалық дамуына қосқан үлесі мен ұйымдастырушылық қабілетінің арқасында оның басқаруындағы аудан ауылшаруашылығы өнімдерін өсіруде облыстағы үздіктер қатарынан көрінді.
Аудан жабылғаннан кейін де Талдықорған және Ескелді аудандарында мемлекеттік қызметте, кейін «Нұр Отан» партиясының аудандық филиалында жетекшілік қызметтер атқарып, қоғамдық-саяси жұмыстың өрлеуіне зор үлес қосты. Партия жұмысының жүйеленуіне, жастар мен жас мамандарға жағдай жасауға, ауылдың әлеуетін арттыруға аянбай тер төкті.
Мейірман Тілеуберлиновтің ел алдындағы еңбегі мемлекет тарапынан лайықты бағаланды. Қазақстан Республикасының Президенті Қасым-Жомарт Тоқаевтың Алғыс хаттары, төрт бірдей медаль, «Нұр Отан» партиясының бірнеше Құрмет грамотасы, Алматы облысы мен Ескелді ауданы әкімдерінің марапаттары – үлкен құрметтің айғағы.
Қазіргі таңда Мейірман аға зейнеткерлік демалыста. Ел болашағына бей-жай қарай алмайтын азамат ретінде облыстық сайлауалды штабы мен партия жанындағы ардагерлер кеңесінің белсенді мүшесі. Жастарға ақыл-кеңесін айтып, елдік мүдде жолында өз тәжірибесін үйретуден жалыққан емес.
Ол тек еңбек майданында емес, адамдық биікте де үлкен тұлға. Ардақты әке, сүйікті ата, адал жар. Немерелеріне адамдықтың, отансүйгіштіктің, мейірім мен еңбекқорлықтың қадірін ұқтырып жүрген өнегелі қария.
Бүгінгі мерейлі 75 жасы – бұл тек өмір жасының межесі емес, халқына сіңірген адал еңбектің, маңдай термен келген жетістіктің, жүрекпен істелген қызметтің шынайы шежіресі.
Еліне еселі еңбегі сіңген Мейірман Тілеуберлинов – нағыз халық азаматы. Оның өмірі – бүгінгі жастарға тағылым, елге адал қызмет етем деген жанға үлгі. Ол ұлағатты ұрпақ өсірді. Жары Гүлнәз Райымбековамен немерелерінің ортасында бақытты ғұмыр кешуде. Гүлнәр тәтеміз де жауапты қызметтер атқарып, елдің әлеуметтік жағдайының жақсаруына атсалысты.
Мерейтойыңыз құтты болсын, абзал аға! Ел алдында мерейіңіз үстем, денсаулығыңыз мықты, абыройыңыз асқақ болсын!
Гүлжан ТҰРСЫН
