Көшкентал – таулы аумақ. Қысы қарлы, жазы жаңбырлы. Биыл қыс таулы аумақта қаталдау болды. Ортасында бораны соғып, үскірігі бет шалып, қар қалың түсіп, мал жайылымға шыға алмай қалды. Төрт түлікті шыдамды адам бағады. Мұндайда қазекем: «Мал баққанға бітеді» дейді. Жыл он екі ай демалмайтын жұмыс. «Исатай» шаруа қожалығы құрылғалы мал басы өсіп, жайылымы кеңейіп, несібесі артты.
Шаруа қожалық иесі Исатай Тұрсынов мал өсіруді бастағанда жайылымды Шыңбұлақ өрісінен алған еді. «Көшкентал» шаруа қожалығында механизатор болып істеген ол жер жағдайын жақсы біледі. Шаруашылыққа арналған жерді дұрыс таңдапты. Кішкентай тұма мал суару мен шөптің бітік шығуына септігін тигізуде. Бүгінде шаруашылықтың тізгінін Исатай ағаның ұлдары – Жеңіс пен Дәукен қолына алған. Олар әкеден қалған мұраны шашау шығармай, өсіріп-өндіріп келеді.
Төрт түлік жазда «Мұзбұлақ» жайлауына шығады. Ол жақта шөп шүйгін. Жылқы, ірі қара, қой-ешкі еркін жайылып, қоңданып, ет алады. Бұрындары мал ауыл маңына жайылатын. Жер таршылық етуші еді. Соңғы жылдары аудан әкімдігі «Мұзбұлақтағы» жайлауды бөліп берді. Енді жақсы болды. Ауыл маңының шөбі шабындыққа пайдаланылады. Былтыр басқа ауылдарда мал азығын дайындайтын шөп болмай қиналғанда «Исатай» шаруа қожалығының шабындығы бітік шықты. Бірнеше мая шөп көктемге еркін жетті. Қыста мал бордақыланып, біразы сатылды. Орнын биылғы төл басады.
Қорадағы 250 қой көктемге ілікті. Мал төлдету науқаны басталды. Қыстан қоңды шыққан саулықтар қозылауда. Қазір бірлі-жарым қой туып жатыр. Бұл – берекелі шақ. Ерте туған қозылар марқа болып қалды. Алда ірі қара бұзаулап, аққа кенелер шақ жақын. «Истатай» шаруа қожалығының жаңа туған төлдері Ешкіөлмес тауының баурайында көбейіп, өсіп-өніп, өрісті шуға бөлеуде. Жеңістің әке мұрасын өркендете беретініне сенеміз!
Гүлжан ТҰРСЫН
Фото: Жұмабай МҰСАБЕКОВ
