Соңғы жылдары сплиттер блоктарына тапсырыс берушілердің қатары көбеюде. Сол себепті кәсіп иелері оны мүмкіндігінше молынан шығаруға тырысады. Мұндай құрылыс заттары саяжай үйлерін, гараждарды, ферма ғимараттарын және жеке аумақ қоршауларын салудың ажырамас бөлігіне айналды. Осы бағытта табысты жұмыс атқарып келе жатқан компаниялардың бірі «Строй инструмент» жеке кәсіпкерлігі. Ол 2019 жылы Бауыржан Нұржігітовтың жетекшілігімен жұмыс істей бастады. Бүгінде мұнда сплиттер және полистиролбетон блоктары шығарылады.
Тәжірибелі кәсіпкердің қызметі 2006 жылы электр тауарларын сататын дүкен ашудан басталды. Электр тауарларының бөлшек саудасы саласында табысты іс жүргізе отырып, құрылыс нарығында сапалы құрылыс материалдарына қажеттіліктің бар екенін байқады. Сөйтіп түрлі нысан салу үшін қолайлы сплиттер мен полистиролбетон блоктарын құру туралы ой туды. Уақыт өте бизнесі алға басып, кең қанат жая түсті. Сплиттер өндірісі мен полистиролбетон блоктарын шығарумен айналыса жүріп, кәсібінің тасы өрге домалады.
Бизнесті өрге сүйреуге әрқашан қаражат қажет. Осыны жақсы білетін кәсіпкер «Қазақстан Халық Банкі» АҚ-ға жүгініп, «Даму» қорының субсидиялау құралын қолдана отырып «Бірыңғай кешенді бағдарлама» шеңберінде несиеге қол жеткізді. Бұл қаражат қабырға блоктарын өндіру қызметін жандандыруға септігін тигізді. Шағын өндірістен жұмысын бастаған компания сплиттер мен полистиролбетон блоктарын өндіруде сенімді компания екенін көрсете білді.
Өндіріс үдерісінде технологияларды сақтау, сапалы шикізат таңдау және өндірістің әр кезеңін қатаң бақылау басты назарда болды. Бұл тәсіл компанияға жергілікті сатып алушылардың сеніміне ие болып қана қоймай, жеткізілім аумағын кеңейтуге мүмкіндік туғызды. Бүгінде аталмыш жеке кәсіпкерлігі болашаққа сенімді қадам басуды жалғастыруда. Ал Бауыржан Нұржігітов құрылыс саласында бәсекеге қабілетті болуда табандылық танытып, табысқа жетудің үлгісі ретінде еңбек етуде.
А. БАЙЖҰМАҚЫЗЫ
