Алдымен қаладағы орташа жөндеуге тиіс Гаухар ана көшесіне атбасын тіреген шаһар басшысы жауатыларға онымен қиылысатын көшелердегі жол белгілерін қайта қарап, қажетті өзгерістер енгізуді және автотұрақтар санын көбейтуді тапсырды. Себебі, бұрын Гаухар ана көшесімен бір бағытта ғана көлік жүретін. Биылдан бастап аталған көше бойымен екі бағытта қоғамдық көлік жүргізу жоспарланған. Бұл Гаухар ана мен қанаттас жатқан Қабанбай батыр көшесімен жүретін автобустардың жүктемесін азайтуға мол мүмкіндік бермек. Сонымен қатар, қала әкімі жол бойындағы жабайы сауданы жою және саудагерлерге қатысты заң аясында шара қолдану қажеттігін қатаң ескертті.
Сала басшыларының айтуынша, орталық базар маңындағы Біржан сал, Гаухар ана көшелері ұзақ жылдар бойы әбден жабайы сауда алаңына айналып кеткен. Бұрын жолдың екі жағасына жайылған жеміс-жидектер мен басқа да тауарлардан және иін тірестіре қойылған көліктерден қала тұрғындарының базарға кіруі мұң болған. Осыған сай мұндай келеңсіздіктерді жойып, базар аумағын ретке келтіру мақсатында биыл Арбат аумағына абаттандыру жұмыстары жүргізілген. Қазіргі уақытта қала әкімінің тапсырмасы бойынша жол жиегін және жаяу жүргіншілер жолын заңсыз иеленіп алған жабайы сауда орындарын тазарту жұмыстары жалғасуда. Ал, саудагерлердің заңды әрі алаңсыз жұмыс жасауы үшін бүгінде қаладағы Абай – Гаухар ана көшелерінің қиылысында заман талабына сай жаңа әмбебап базар салынуда.
– Ұзақ жылдар бойы қала орталығындағы жабайы сауда мәселесі өзекті болып келді. Енді бұл мәселені жүйелі түрде шешуге кірістік. Мысалы, Біржан сал көшесі – осының айғағы. Бұрын бұл көшеде де жол үстінде сауда қызатын. Қазіргі таңда аталған көше толық абаттандырылып, қала тұрғындары үшін жаңа демалыс орнына айналып отыр. Мұндай жұмыстарды алдағы уақытта да жалғастырамыз, – деді Ернат Дүйсенбекұлы.
Айдын КӘЛІМХАН
