Соңғы уақытта азаматтардың кез келген санаты үшін зейнетақы жинақтарының ең төменгі жеткіліктілік шегінен (ТЖШ) асатын бөлігін алу бойынша төмен пайызбен делдалдық қызметтер көрсету туралы әлеуметтік желілерде және онлайн-хабарландыру платформаларында ұсыныстар таратылуда.
«БЖЗҚ» АҚ баспасөз орталығының мәліметінше, «делдалдар» уәкілетті операторлардың логотиптерін пайдалана отырып, зейнетақы жинақтарын алу бойынша жақын арада өзгерістер күтілетіні туралы хабарлайды. Ал мұндай ақпараттың шындыққа жанаспайтыны қатаң түрде ескертіледі. Сондай-ақ, зейнетақы жинақтарын ҚР Әлеуметтік кодексінде көзделген жағдайларда ғана алуға болады. Ең алдымен, ол – зейнет жасы, мерзімсіз уақытқа 1 немесе 2 топ мүгедектігінің белгіленуі, ҚР аумағынан тыс ТТЖ кету, мұрагерлік.
Зейнетақы жинағының бір бөлігін тұрғын үй жағдайын жақсарту немесе емделу ақысын төлеу мақсатына заңмен бекітілген талаптарды орындаған жағдайда, мына санаттағы азаматтар алуға құқылы. Атап айтсақ, ең төменгі жеткіліктілік шегінен асатын жинағы бар салымшылар (ең төменгі жеткіліктілік шегінен асатын сома мөлшерінде); зейнетақысы жоғалтқан табысының (бұрын алынған жалақысының) кемінде 40% құрайтын зейнеткерлер – олар шотта қалған жинағының 50% дейін пайдалана алады; еңбек сіңірген жылдары бойынша зейнеткерлер (жинағының 100% дейін); зейнетақы аннуитеті шартын жасасқан салымшылар (жинағының 100% дейін).
Зейнетақы жинақтарын тұрғын үйге немесе емделуге мақсатты пайдалану үшін тек уәкілетті операторлар – екінші деңгейдегі банктер арқылы ғана алу мүмкін. Тиісінше, делдалдық қызметтер қажет емес. Бұл ретте БЖЗҚ ешқандай ақы алмайды. Күмәнді әрекетке қатысуға келісе отырып, сіз ақшаңызды жоғалту қаупін тудырып қана қоймай, болашақта басқа алаяқтық әрекеттер үшін пайдаланылуы мүмкін жеке деректеріңіздің сақталуына да қауіп төндіресіз. БЖЗҚ өз салымшылары мен алушыларына мұндай ұсыныстарды елемеуге, тек ресми көздерден ақпарат алуға және құқықтық тұрғыдан қорғалған салада ғана әрекет етуге кеңес береді.
«БЖЗҚ» АҚ баспасөз қызметі
Фото: Tengrinews.kz / Тұрар Қазанғапов
