«Атамекен» кәсіпкерлер палатасында ұйымдастырылған жиынға белгілі адвокаттар, нотариустар, прокурорлар, тергеушілер, сот орындаушылары, мемлекеттік және құқық қорғау органдардың басшылары қатысып, тұрғындардың көкейінде жүрген сауалдарға жауап берді. «Тұрғын үй, жер мәселесі бойынша заң көмегіне жүгінгендер көп», – дейді мамандар.
– Облыстық әкімдіктің мұрындық болуымен өткен акцияның мақсаты – құқықтық сауаттылықты арттыру, азаматтардың мәселесін заң аясында шешу. Жылда дәстүрлі түрде өтетін шара болғандықтан тұрғындарға алдын ала хабар беріп, тегін кеңес алуға шақырдық, – дейді облыстық әділет департаментінің басшысы Ержан Еркенов.
Айта кетейік, облыстық әділет департаменті жыл басынан бері 12 шара ұйымдастырыпты. Нәтижесінде 7 мыңға жуық адам тегін заңгерлік көмек алған. Бүгінгі шарада 40-қа жуық маман тегін заңгерлік кеңес берді. Тұрғындар маманмен сөйлескеннен кейін әрі қарай не істеу керектігін сұрап, мәселесінің тез шешілу жолдарын да біліп, «осындай игі шара жиі ұйымдастырылып тұрса» деген тілек айтты.
– Осындай акция жиі өткізілсе жақсы болар еді. Өйткені әркімнің кеңес алу үшін адвокатқа жүгінуге немесе бірден бірнеше мемлекеттік билік органдарының өкілдерімен бір алаң аясында кеңес алуға қаржылық мүмкіндігі жоқ. Білікті мамандарға жүгініп, мәселемнің шешімін таптым, – дейді қала тұрғыны Бектеміс Бектұрғанов.
– Мен II топтағы мүгедекпін. Зейнетке шығуға да жасым келіп қалды. Соған орай қандай құжат жинау керек, одан басқа да сауалдарымды білікті мамандарға қойдым. Көтерген мәселем шешілетін болды, – дейді қала тұрғыны Ұлболсын Нұрсапаева.
Халыққа құқықтық көмек көрсету, тұрмыстық және әлеуметтік мәселелерде заң аясында дұрыс шешім қабылдауға жәрдемдесу, құқықбұзушылықтың алдын алу және қоғамда құқықтық мәдениетті нығайту мақсатындағы кездесу барысында тұрғындарға қажетті тақырыптар бойынша ақпараттар берілді.
Айдар Қалиев
