Туризм және спорт министрі Ербол Мырзабосынов үкімет отырысында елімізде жаңа стадиондар құрылысының барысы туралы баяндады, деп хабарлайды 7-su.kz ақпараттық порталы Stan.kz сайтына сілтеме жасап.
Министрдің айтуынша, Алматыда жаңа стадион салу жоспарланып отыр. Сонымен қатар жеті қалада жеті стадионға жобалық-сметалық құжаттама дайындалған. Қызылордада УЕФА стандарты бойынша үшінші санатқа сәйкес келетін стадион биыл күзде пайдалануға берілмек.
«Мемлекет басшысының тапсырмасымен стадиондар салу жұмыстары басталып кетті. Стадиондардың мемлекетке түсетін түпкілікті құны жобалау жұмыстары аяқталған соң белгілі болады. Сондай-ақ Президент шетелдік тәжірибені ескеріп, стадиондарды ел қаржысынан қаржыландырмау жөнінде міндеттер қойды», – деді Ербол Мырзабосынов.
