Әлемге әйгілі ESPN спорт порталы 2000 жылдан бері рингке шыққан 25 үздік боксшының тізімін жариялады, – деп хабарлайды 7-su.kz ақпараттық порталы.
1bol.kz мәліметінше, рейтингтің көшін жеңіліп көрмеген америкалық Флойд Мэйвезер (50-0, 27 КО) бастады. Одан кейінгі орындарды филиппиндік Мэнни Пакьяо (62-8-3, 39 КО) және америкалық Бернард Хопкинс (55-8-2, 32 КО) иеленді.
Қазақстандық Геннадий Головкин де үздіктер қатарынан табылып, 11-орынға жайғасты.
Басылым GGG-дің жетістіктеріне арнайы тоқталды. Ол кәсіби рингте 42 рет жеңіп, 2 рет жеңіліп, 1 кездесуді тең аяқтаған (37 нокаут). 2006-2022 жылдары орта салмақта әлем чемпионы белбеуін қатарынан 20 мәрте қорғап, бұл көрсеткіш бойынша Бернард Хопкинспен тең түсті.
Головкин 2008–2016 жылдары қатарынан 23 қарсыласын нокаутқа жіберіп, «нағыз нокаутшы» деген атаққа ие болды. 2018 жылы «Канело» Альвареспен өткен жекпе-жекте төрешілер шешімімен жеңілгенімен, олардың трилогиясы (0-2-1) бокс тарихындағы ең тартысты сериялардың бірі ретінде есте қалды.
GGG кәсіби мансабында 45 жекпе-жек өткізіп, бірде-бір рет нокдаунға түспеді. Сондай-ақ әуесқой деңгейде 350-ге жуық кездесу өткізіп, ешқашан құламаған. Осылайша ол бокстағы ең мықты «темір иектердің» бірі ретінде тарихта қалды.
Қазір Геннадий Головкин Қазақстан Ұлттық олимпиадалық комитетінің президенті және Халықаралық World Boxing ұйымының олимпиадалық комиссиясын басқарады.
