Басқосуда Бейбіт Өксікбайұлы: «Мемлекет басшысының Жолдауы нақты нәтижеге, азаматтардың табыс деңгейін арттыруға бағытталған іс-қимылдың айқын алгоритмі. Мемлекет басшысы еліміздің алдына аса маңызды стратегиялық мақсат қойды. Қазақстан үш жыл ішінде толық цифрлық мемлекетке айналуы тиіс. Осы бағытта Президентіміз жеті нақты міндет жүктеді», – дей келе әр жүктелген міндетке жеке-жеке тоқталып, облыста атқарылып жатқан жұмыстар мен алдағы жоспарды баяндады.
Ел Президенті тапсырған алғашқы міндет елімізге қомақты инвестиция тарту. Аймақ басшысының айтуынша, облыс құрылғаннан бері 1,2 трлн. теңге инвестиция құйылыпты. Оның ішінде жекеменшік 808,5 млрд. теңге. Биылғы жалпы сомасы 37 млрд. теңгені құрайтын 14 ірі жобаны іске асыру жоспарланған. Бұл 830-дан астам жаңа жұмыс орнын ашуға мүмкіндік береді. «Қорғас – Шығыс қақпасы» арнайы экономикалық аймағында және «Қорғас» шекара маңы ынтымақтастығы халық-аралық орталығында жалпы құны 1 трлн. теңгеге жуық 65 жоба жүзеге асырылып жатыр, олардың нәтижесінде шамамен 8 мың жұмыс орны құрылады. Бұл орталықтар Қазақстан мен Қытай арасындағы сауда-экономикалық ынтымақтастықты дамытуға септігін тигізеді. Осыған орай Бейбіт Исабаев орынбасары Әсет Қанағатовқа, кәсіпкерлік және индустриялық-инновациялық даму басқармасына, аудан және қала әкімдеріне инвестиция әкелу жұмыстарын одан әрі күшейтуді, орта және шағын инвесторлармен жүйелі жұмыс жүргізудің тиімді моделін енгізуді, жоспарланған инвестициялық жобалардың белгіленген мерзімде іске асырылуын қатаң бақылауға алуды тапсырды.
– Мемлекет басшысының тапсырмаларына сәйкес облыста өңдеу өнеркәсібін дамыту үшін жүйелі шаралар жүзеге асырылуда. 2025 жылдың 7 айында өңір экономикасы тұрақты өсім көрсетіп, өңдеу өнеркәсібінің индексі 103,9%-ға жетті. Бұл үрдіс ірі инвестициялық жобалар, кәсіпорындарды жаңғырту және бизнеске қолайлы жағдай жасау арқылы жалғасуда. Мысалы, «Қайнар АКБ», «Алмаз Керамикс», «ASMA Industrial», «SSA Feed Mills», «Майями Солар» және қант қызылшасын өңдеуші кәсіпорындар. Стратегиялық бағыттардың бірі – жоғары технологиялық өндірістерді дамыту, – деген Бейбіт Өксікбайұлы ірі жобалар мен кәсіпорындарды жаңғырту арқылы 1,3 трлн. теңгеге Көксай мыс өңдейтін зауыт салу жоспарланғанын, онда 2200 жұмыс орны ашылатынын айтты.
Сондай, аймақ басшысы орынбасары Әлібек Жақанбаев пен Әсет Қанағатовқа, кәсіпкерлік және индустриялық-инновациялық даму басқармасына, аудан және қала әкімдерімен бірлесіп, өңірдің инновациялық шешімдерін енгізуді және өндірістік секторын нығайтуды қамтамасыз етуді тапсырды.
Жиын барысында Мемлекет басшысының тапсырмасына сәйкес ауыл шаруашылығын жаңа деңгейге көтеру, көлік-логистика саласын дамыту, туризмді, шағын және орта кәсіпті өркендету, тұрғын үй-коммуналдық шаруашылығы мен су инфрақұрылымын, адам капиталын дамыту арқылы экономиканы жан-жақты жаңғырту мәселелері кеңінен талқыланып, жүктелген міндеттер жүйелі атқарылу үшін аймақ басшысы әр салаға жауапты мамандарға нақты тапсырма берді.
Айдар ҚАЛИЕВ
