Шарада Бейбіт Өксікбайұлы ел азаматтарының әл-ауқатын арттыру, сол арқылы халықтың денсаулығын сақтауға жағдай жасау мемлекеттің басты міндетінің бірі екенін айтып, өңірде атқарылып жатқан шараларды баяндады.
– Соңғы 3 жылда облыста медициналық жабдықтармен қамту 93%-ға жетті. Өңірдегі санитарлық автопарк 2022 жылдан бері 167 арнайы автокөлікпен толықты. Соның ішінде бүгін біз 29 көліктің кілтін тапсырғалы отырмыз. Жалпы өткен 8 айда жедел жәрдем қызметіне 343 мыңға жуық шақырту түскен, яғни орта есеппен алғанда күніне 1100-дей алғашқы көмек көрсетіледі. Сондықтан қажетті санитарлық автоқұралдармен қамтудың маңызы зор. Бүгінгі беріліп отырған «жедел жәрдем» көліктерінде алғашқы көмекке қажетті барлық жабдық бар. Бұл медициналық қызмет көрсетудің жылдамдығы мен сапасын жақсартуға ықпал етеді деп сенеміз, – деген облыс әкімі аудан-қалалардағы медицина мекемелеріне «жедел жәрдем» көлігінің кілтін тапсырды.
Санитарлық көліктер 13 медициналық мекемеге, атап айтқанда Қаратал, Сарқан, Панфилов, Көксу, Ақсу, Кербұлақ, Ескелді, Алакөл аудандық ауруханаларға үш көліктен, Текелі қалалық ауруханасы мен Талдықорған қалалық емханасына, облыстық перинаталдық орталыққа, облыстық дәрігерлік-дене тәрбиесі диспансері мен облыстық жұқпалы аурулар ауруханасына бір көліктен берілді.
Санитарлық көліктің кілтіне ие болғандардың бірі Ақсу аудандық орталық ауруханасының бас дәрігері Байқадам Құрымбай:
– Президент тапсырмасына сәйкес ауылдық жерлерде медициналық қызмет сапасын арттыруда, жаңа медициналық құрал-жабдықтармен қамтуды жақсартуда біз мемлекет тарапынан үнемі қолдауды сезініп келеміз. Мысалы, Ақсу аудандық ауруханасына 21 медицина маманы жетіспейтін, бүгінгі күні 16 маман жұмысқа қабылданып, олар 10 млн. теңге көлеміндегі бірреттік қаржылай қолдауға ие болды. «Ауылдағы денсаулық сақтауды жаңғырту» ұлттық жобасы аясында салынған 4 ғимарат қолданысқа беруге дайын. Сонымен қатар, 7 ауылда блокты-модульді медицина нысандар іске қосылды. Аудандық ауруханамыз күрделі жөндеуден өткізіліп жатыр. Бүгін «жедел жәрдем» көліктеріне ие болдық. Осындай игі істер үшін ризашылығымызды білдіреміз, – деді.
Облыста денсаулық сақтау инфрақұрылымын дамытуға, материалдық-техникалық базаны жақсартуға, дәрігерлер тапшылығы мәселесін шешуге ерекше назар аударылып, қажетті жағдайлар жасалуда. Үш жылда 162 медицина нысаны салынып, 10-ы күрделі жөндеуден өткен, соның 75-і биылғы жыл үлесінде, олардың басым бөлігі ауылдық жерлерде қарастырылған. Сондай-ақ, өңірге келген дәрігерлерге 5 және 10 млн. теңге көлемінде көтерме жәрдемақы төлеген республикадағы алғашқы аймақ. Өткен жылдан бері бұл қолдау 120 дәрігерге көрсетілген. Ал Сарқан, Ақсу, Алакөл, Қаратал аудандарында және Текелі қаласында дәрігерлер тұрғын үймен қамтамасыз етілді. Қабылданып жатқан шаралардың нәтижесінде өңірде дәрігерлер тапшылығы 20,3%-ға азайған.
Айдар ҚАЛИЕВ
