Жетісу облысында жан түршігерлік жол апаты болып, салдарынан 10 адам көз жұмды. Тағы бір адам ауыр жарақат алып, ауруханаға жеткізілді. Бұл туралы 7-su.kz ақпарат порталының тілшісі хабарлайды.
Полиция департаментінің мәліметінше, қайғылы оқиға 14 қыркүйек күні түнгі сағат 01:30 шамасында Алматы-Өскемен автожолының 479-шақырымында, Алакөл ауданына қарасты Көлбай ауылының маңында болған.
Алдын ала деректер бойынша, Nissan Cefiro маркалы автокөліктің жүргізушісі қарсы бағыттағы жолаққа шығып кеткен. Салдарынан ол ВАЗ-2114 және Chevrolet Cobalt маркалы көліктерімен соқтығысқан.
Жол апатының салдарынан оқиға орнында 10 адам қаза тапты. Ал тағы бір жолаушы түрлі дене жарақаттарымен аудандық ауруханаға жеткізілді.
Қазіргі уақытта бұл дерек бойынша қылмыстық іс қозғалып, сотқа дейінгі тергеу амалдары жүргізілуде. Полиция апаттың нақты себебін анықтап жатыр.
Құқық қорғау органдары жүргізушілерге жол қозғалысы ережелерін қатаң сақтауды ескертеді. Әсіресе жылдамдық режимін, маневр жасау талаптарын және жолаушылардың қауіпсіздігін қамтамасыз ету міндетті екенін айтады. Себебі жол ережесінің болмашы ғана бұзылуы орны толмас қайғыға әкелуі мүмкін.
