Қаржылық мониторинг агенттігі (ҚМА) азаматтарды алаяқтықтың жаңа түрінен сақ болуға шақырды. Енді қылмыскерлер «жұмыс орнында тексеріс жүріп жатыр» деген сылтаумен хабарласып, құжаттарды ұсынуды немесе «ынтымақтастықты» талап етуде, – деп хабарлайды 7-su.kz ақпараттық порталы.
Алаяқтар көбіне орта және жоғары оқу орындарында тексеріс жүргізіліп жатқанын айтып сендірмек болады. Олар жалған логотиптер мен мөр қойылған бланкілерді пайдаланып, өзін ҚМА қызметкері ретінде таныстырады. Кейін телефон арқылы банк шоттары туралы мәліметтерді сұрап, кейде ақша бопсалауға да барады.
ҚМА дерегінше, мұндай шағымдарда жиі қайталанатын жалған қызметкерлердің тегі: «Мыктыбаев», «Хамзин», «Жалимов», «Жалимбетов».
ҚМА ресми түрде ескертеді:
-
мұндай тексерістер жүргізбейді;
-
азаматтарға ресми хатсыз телефон шалмайды;
-
жеке деректерді сұрамайды;
-
ақша аударуды талап етпейді;
-
тек заң аясында әрекет етеді.
Агенттік азаматтарды мұқият болуға, арандатушылыққа ермеуге шақырады. Күмәнді жағдай туындаса, 1458 Call-орталығына немесе +7 (727) 279-20-86 нөміріне дереу хабарласу ұсынылады.
