Ескелді ауданына қарасты Бақтыбай ауылының Сүйінбай көшесінде ұзын сонар орнатылған темір қоршау тұрғындардың наразылығын туғызуда. Жаяу жүргіншілердің қауіпсіздігін қамтамасыз етуге қойылған қаша керісінше жүргізушілер үшін қауіпті тосқауылға айналған.
Осы көшенің тұрғыны Айдана Мұхаметхан мұны күнделікті басты проблемаға айналған деп отыр:
– Көлікпен бас жолға шығу мүмкін емес. Алдымен көлікті тротуардан асырып барып, жолдың жартысына шыққанда ғана қарсы бағыттағы машиналарды көресің. Соның кесірінен талай апат болды. Жол мүлде көрінбейді, – дейді ол.
Шынында да қызметтік көлікпен көлденең жолға шығып байқағанымызда, қара түсті қоршаудың ар жағында келе жатқан көлікті көру мүмкін болмады.
Бұл сөзді ауыл тұрғыны Дәурен Төлепберген де қуаттап:
– Жақында ғана әріптесім осы жерде соқтығыса жаздады. Оның үстіне, осы көшеде жол белгілері жоқ, жылдамдық шектеулері қойылмаған. Қоршаулардың өзі майысып, қисайып кеткен, – деп ашынады ол.
Ауыл тұрғындарынан өзге, сырттан келетін адамдар да бұл жағдайды баса назар аудару керектігін айтады. Мәселен, көрші ауылдан қатынап істейтін Аманжол Өмірханов та осындай жағдайға куә:
– Өз көзіммен «Camry 30» көлігі мотоциклге соғылғанын көрдім. Құдай сақтап, зардапсыз аяқталды. Бірақ мұндай жағдай жиі қайталанып отыр. Адам шығыны болмай тұрғанда, дер кезінде ушықтырмай, мына қоршауларды алып тастаса дұрыс болатын еді, – дейді ол.
Ауыл әкімі Айдос Қасиевтің айтуынша, мәселе облыстық маңызы бар жолға қатысты болғандықтан, шешім қабылдау да облыстық басқарманың құзырында. Басқарма өкілдері қараша айына дейін қоршаудың жартысын яғни бір бөлігін кесіп алып, жолдың көрінуін қамтамасыз етеміз деп уәде беріпті.
Алайда Сүйінбай көшесіндегі қоршау ғана емес, ауылдың өзге көшелеріндегі тазалық та алаңдатады. Мәселен, Мақатаев көшесінің шығаберісінде жол бойы қоқысқа толып, өлексе сасып жатыр. Әкімдіктің сөзінше, арнайы ДТ маркалы жүк көлігі қоқыс үйінділерін тазалап отырады. Бірақ кейбір тұрғындар әлі күнге дейін тұрмыстық қалдықтарын жол жиегіне төгіп кететін көрінеді. Алдағы уақытта бұл тәртіпсіздіктің алдын алу үшін ауылда төрт жерге бейнебақылау камерасы орнатылмақ.
Қоршаудан туындаған жол қауіпсіздігі мен көшенің қоқысқа толуы – ауыл тұрғындарының күнделікті өмір сапасын төмендетіп отырған өзекті мәселе. Жауапты мекемелер уәде еткендей нақты әрекетке көшсе, халықтың жанайғайы да азаяр еді. Әйтпесе, бұл проблемалар ертеңгі күні үлкен апатқа ұласуы мүмкін.
Санжар СҰЛТАНҒАЗЫ
Ескелді ауданы
