Жетісудың қақ төрінде қазақ руханияты үшін мәні терең, мазмұны салмақты шара өтті. Белгілі жазушы, этнограф Зейнолла Сәніктің 90 жылдық мерейтойы аясында С.Сейфуллин атындағы облыстық кітапханада елге танымал қаламгерлермен тағылымды кездесу ұйымдастырылды.
Бұл рухани жиынды Жетісу облысының Мәдениет, архивтер және құжаттама басқармасының қолдауымен Қазақстан Жазушылар одағының облыстық филиалы өткізді. Әдеби кешті филиал төрағасы, ақын Жангелді Немеребай жүргізіп, қаламгерлер мен оқырмандарды сырлы әңгімеге жетеледі.
– Мұндай қаламгерлермен кездесулер үнемі болып тұрады. Жетісу жерінде де жас жазба ақындар мен айтыскер ақындар өсіп келеді. Біз бұл әдебиет жолында тынымсыз еңбектеніп, жас буынға бағыт-бағдар беруді басты мақсат етеміз, – деді ол.
Жиынға Қазақстан Жазушылар одағы басқарма төрағасының орынбасары Бейбіт Сарыбай бастаған белгілі қаламгерлер қатысты. Олардың қатарында ақын Байбота Қошым-Ноғай, жазушы Нұрдаулет Ақыш, Жұмабай Құлиев, Ерғали Бақаш, Қанат Қайым және ақын Ерлан Жүніс бар.
Әдебиет майталмандары Зейнолла Сәніктің шығармашылығына кеңінен тоқталды. Ақын Байбота Қошым-Ноғай қаламгердің еңбектерінің басым бөлігі Қытайда жарық көргенін атап, этнографияның халықтың тарихы мен мәдениетін түгендеудегі маңызына ерекше екпін берді. Ал жазушы Жұмабай Құлиев Зейнолла Сәнік туындыларындағы ұлттық болмыстың айқын көрінісін сөз етсе, өзге қаламгерлер де оның қазақ әдебиеті мен ғылымындағы орнын айшықтап, тың ойларымен бөлісті.
Әдеби кеш барысында оқырмандар да сұрақ қойып, пікір білдіруге мүмкіндік алды. Бұл жиын Зейнолла Сәнік мұрасын дәріптеумен қатар, қазақ әдебиетінің бүгіні мен ертеңі жайлы ой қозғаған, жастарды рухани құндылықтарға баулаған маңызды басқосу болды.
Кездесу соңында қазақ дәстүріне сай келген қонақтарға шапан жабылып, сый-құрмет көрсетілді. Жетісуда өткен мерейтойлық жиын әдебиеттің мерейін өсіріп қана қоймай, Зейнолла Сәнік мұрасының мәңгілік екенін тағы бір мәрте айқындап берді.
Санжар СҰЛТАНҒАЗЫ
