Талдықорған қаласындағы С.Мұратбеков атындағы №9 орта мектепте жастарға бағытталған тағылымды кездесу өтті. Облыстық Қазақстан халқы Ассамблеясы жанындағы Аналар кеңесінің ұйымдастыруымен өткен бұл жиын «Салауатты сана» жобасы аясында «Нашақорлық – отбасы мен қоғамның қасіреті» тақырыбына арналды.
Кездесудің мақсаты – жас буынға нашақорлықтың зиянын түсіндіру, салауатты өмір салтын насихаттау және жастарды жауапкершілікке шақыру.
Шараны облыстық Аналар кеңесінің төрағасы Несіпжамал Баймадиева ашып, қоғам үшін өзекті мәселеге тоқталып:
– Бүгінгі өткен кездесу жастар үшін аса маңызды болды деп ойлаймын. Себебі нашақорлық – бүкіл қоғамның қасіреті. Мұндай шаралар арқылы өскелең ұрпаққа дұрыс бағдар беріп, олардың бойында жауапкершілік пен салауатты өмір салтын қалыптастыруға үлес қосамыз. Жастарымыздың саналы, дені сау болып өсуі – әрбір ата-ана мен қоғамның басты міндеті. Алдағы уақытта да осындай алдын алу бағытындағы кездесулер жиі ұйымдастырылып отырса, нәтиже берері сөзсіз, – деді ол.
Жиынға облыстық психикалық денсаулық орталығының нарколог-дәрігері Талшын Мұхамеджан және облыстық ПД Есірткі қылмысына қарсы іс-қимыл басқармасының полиция майоры Дастан Мырзақұлов қатысып, нақты деректер келтірді. Олар есірткіге тәуелділіктің медициналық, әлеуметтік және құқықтық салдарын түсіндіріп, жастарды сақ болуға шақырды.
Кездесу барысында бейнематериалдар көрсетіліп, нашақорлықтың зияны жайлы мағлұмат берілді. Оқушылар мамандарға сұрақтарын қойып, пайдалы ақпарат алды. Сондай-ақ, ұйымдастырушылар мұндай кездесулердің алдағы уақытта да жүйелі түрде жалғасатынын жеткізді.
Санжар СҰЛТАНҒАЗЫ
