Қазақстандағы мектеп түлектері тапсыратын ұлттық бірыңғай тестілеу (ҰБТ) үлкен өзгерістерге ұшырауы мүмкін, – деп хабарлайды 7-su.kz ақпараттық порталы Atameken Business арнасына сілтеме жасап.
Ғылым және жоғары білім министрі Саясат Нұрбектің айтуынша, енді ҰБТ халықаралық стандартқа бейімделмек. Бұл бастама Мемлекет басшысы Қасым-Жомарт Тоқаевтың тапсырмасымен қолға алынған. Президент Нью-Йоркте Educational Testing Service (ETS) ұйымының бас атқарушы директоры Амит Севакпен кездескен.
ETS деген кімдер?
ETS – әлем бойынша емтихандар мен түрлі тесттерді әзірлейтін ең беделді ұйымдардың бірі. TOEFL, GRE секілді халықаралық деңгейдегі сынақтарды жасаушы да – осы компания.
ҰБТ қалай өзгереді?
Министрдің сөзінше, ETS мамандарымен бірлескен жұмыс тобы құрылады. Ол ҰБТ-ның қазіргі мазмұны мен әдістемесін толықтай қайта қарап, жаңа формат ұсынбақ.
«Әлемдік деңгейдегі ең мықты мамандар ҰБТ-ны халықаралық тестке айналдыру үшін жұмыс істейтін болады. Бұл бірнеше кезеңнен тұрады. Мақсатымыз – ең үздік әдістемені қолданып, сұрақтардың сапасын барынша арттыру», – деді Саясат Нұрбек.
Жаңа бастама жүзеге асса, Қазақстанның басты емтиханы әділдігі мен сапасы жағынан әлемдік стандарттарға сай келетін тесттердің қатарына қосылмақ.
