Жетісу өңірінде қазақ тілі мен әдебиеті пәні мұғалімдерінің біліктілігін арттыруға бағытталған ерекше курс өтті. Курс тақырыбы – «Қазақ тілінде оқылатын мектептердегі «Қазақ тілі» және «Қазақ әдебиеті» пәндері педагогтерінің пәндік және кәсіби құзыреттіліктерін дамыту» аталады.
Бағдарлама тыңдаушылардың оқылым мен жазылым дағдыларын жетілдіруге, грамматиканы коммуникативтік тұрғыдан оқыту әдістемесін терең меңгеруге негізделді. Теориялық дәрістермен қатар, практикалық жаттығулар да ұйымдастырылып, ұстаздардың кәсіби және пәндік құзыреттілігін шыңдауға мол мүмкіндік берілді.
Курстың басты ерекшелігі – шығармашыл ұстаздардың бас қосуы болды. Барлығы 22 педагог білімін жетілдірді. Оның ішінде 11-і – педагог-зерттеуші, 2-і – педагог-сарапшы, 9-ы – педагог-модератор санатындағы мамандар. Араларында ақын да, жазушы да, журналист те бар. Бұл өз кезегінде топтың рухани әлеуетін арттырып, курсты ерекше шығармашылық ортаға айналдырды.
Курсқа қатысқан Талдықорған қаласындағы №29 мектептің қазақ тілі мен әдебиеті пәні мұғалімі Ерден Нұрахмет әсерімен бөлісті:
«Бұл курстан өзіме мол әдістемелік қор жинадым. Әсіресе грамматиканы оқушыға тек ереже түрінде емес, өмірлік жағдаяттар арқылы меңгертудің жолдарын үйрендім. Сонымен қатар әріптестерімнің тәжірибесімен бөлісіп, жаңа идеялар алдым. Мұндай шығармашылық орта ұстаз үшін үлкен серпіліс береді», – дейді ол.
Курсты жүргізген тренер – қазақ тілі мен әдебиеті пәнінің мұғалімі, зерттеуші біліктілік санатындағы тәжірибелі ұстаз, 20 жылдық еңбек өтілі бар Калибекова Ляззат Сайлаубековна. Ол Ескелді ауданы, Маметова атындағы орта мектепте қызмет атқарады. Облыс көлемінде тұңғыш рет курс өткізген Ляззат Сайлаубекқызы бұл тәжірибесін үлкен жауапкершілікпен қатар, үйрену алаңы ретінде қабылдағанын айтады:
«Мен де сіздер сияқты практик-мұғаліммін, ұстазға не керегін жақсы түсінемін. Бұл курс ұстаздарды біліктілігін шыңдап қана қойған жоқ, ұжымдық атмосфераны сезіндірді», дейді ол.
Бұл курс қатысушылардың кәсіби дамуына ғана емес, шығармашылық ынтымақтастық орнатуына да жол ашты.
Мұхтар Күмісбек
