Қазақстанда коммуналдық қызмет тарифтерін қаншалықты көтеруге болатыны туралы сұраққа Ұлттық экономика министрі, вице-премьер Серік Жұманғарин жауап берді.
Бұл туралы 7-su.kz ақпараттық порталы хабарлайды.
Министрдің айтуынша, тарифтер «жайдан-жай көтерілмейді».
«Мысалы, егер сіз Астананың тұрғыны болсаңыз, кез келген табиғи монополия субъектісі тарифті көтермес бұрын қоғамдық тыңдау өткізеді. Сіз бара аласыз, қатыса аласыз, миллиондаған сұрақ қоя аласыз. Әрбір бұрандаға, әр тиынның қайда жұмсалатынына дейін түсіндіріледі. Себебі тарифтің көтерілуі – бұл ең алдымен сіздің қалтаңыздан қосымша қаржы алынуы», – деді Серік Жұманғарин жаңа Салық кодексіне қатысты семинардың кулуарында.
Ол бұл процесті «жеткілікті дәрежеде ашық» деп атап, тарифтердің өспеуі болашақта қазақстандықтардың қазіргі алып отырған қызметінен айырылуына әкелуі мүмкін екенін айтты.
«Жарайды, Астана жаңа қала, әсіресе сол жағалауы. Ал кейбір қалаларда инфрақұрылымның тозу деңгейі 70-90%-ға жеткен. Моноградтарда 100 пайызға дейін барады. Қыста құбыр жарылса немесе Екібастұздағы жылу электр станциясы сияқты жағдайлар қайталанса, мұндай оқиғалар жиілей береді. Соңында жағдайымыз қиындайды. Қыста батареялар қатып қалса, оны кім қалайды? Басқа балама жоқ», – деді Жұманғарин.
