Жетісу облысында Полиция департаментінің Арнайы және кәсіби даярлық басқармасы еңбек өтілі бір жылға жетпеген қызметкерлер үшін «Ынтымақ, бірлік және өзара түсіністік – ұжымның негізі!» атты тимбилдинг ұйымдастырды, деп хабарлайды 7-su.kz ақпарттық порталы.
Шара жас мамандардың моральдық-психологиялық жағдайын нығайту, алғашқы қызмет кезеңінде кәсіби бейімделуіне қолдау көрсету және ұжымдық рух қалыптастыру мақсатында өтті.
Тимбилдинг барысында сенімге, өзара қолдауға және жылдам шешім қабылдауға бағытталған түрлі логикалық ойындар мен жаттығулар өткізілді. Қызметкерлер тапсырмаларға белсенді қатысып, бастамашылдық танытып, командалық жұмысқа бейімділігін көрсетті.
Қатысушылар мұндай кездесулердің кәсіби және жеке дамуға пайдалы екенін атап өтті. Ал ұйымдастырушылар аталған шаралар тұрақты түрде өткізілетінін, бұл өз кезегінде «Заң және тәртіп» тұжырымдамасын жүзеге асыруға, сондай-ақ ұйымшыл әрі кәсіби полиция ұжымын қалыптастыруға ықпал ететінін жеткізді.
