Қасым-Жомарт Тоқаев Қазақстан мен Италия арасындағы достық пен ынтымақтастықты дамытуға қосқан ерекше еңбегі үшін Италия Президенті Серджо Маттареллаға І дәрежелі «Достық» орденін табыс етті, деп хабарлайды 7-su.kz ақпараттық порталы.
Мемлекет басшысы бұл марапат қазақ елінің шынайы құрметі әрі барша Италия халқына деген достық пен ықыластың белгісі екенін атап өтті. Ол Серджо Маттарелланы халықтың қолдауына ие болған көшбасшы, әлемге танымал саясаткер деп бағалады.
Президенттің айтуынша, Италия бүгінде экономика, инновациялық технология, экология және «жасыл» энергетика саласында жетістікке жетіп, аймақтық әрі жаһандық қауіпсіздікті қамтамасыз ету ісінде маңызды рөл атқарып отыр.
Сонымен қатар Қасым-Жомарт Тоқаев Серджо Маттарелланың екі ел арасындағы саяси диалог пен сауда-экономикалық, мәдени-гуманитарлық байланыстарды дамытуға қосқан үлесін ерекше атап өтті. Оның сөзінше, көпжақты құрылымдар аясында орнаған тығыз ынтымақтастық стратегиялық серіктестікті одан әрі күшейте түседі.
Мемлекет басшысы Қазақстан мен Италия халықтарының достығы алдағы уақытта да нығая беретініне сенім білдірді.
