Президент Қасым-Жомарт Тоқаев Жасанды интеллектіні дамыту жөніндегі кеңестің отырысында заманауи технологиялардың білім беру жүйесіне ықпалын атап өтті, – деп хабарлайды 7-su.kz ақпараттық порталы.
Мемлекет басшысының айтуынша, жасанды интеллект қала мен ауыл арасындағы білім сапасындағы алшақтықты азайтуға, шағын жинақты мектептер үшін тиімді құрал болуға және ерекше білім беру қажеттілігі бар балаларға жан-жақты қолдау көрсетуге мүмкіндік береді. Бұл бағытта негізгі мақсат – шынайы инклюзивті білім беру ортасын қалыптастыру.
Сонымен қатар Президент жаңа технологияларды енгізу барысында ұлттық мәдениет пен құндылықтарды сақтаудың маңыздылығын ерекше атап өтті. «Жаңа технологияны меңгерсек те, өзіміздің төл мәдениетімізді және ұлттық құндылықтарымызды қорғауымыз қажет. Білім беру жүйесіне халқымызға жат идеялар енуіне жол берілмеуі тиіс. Жасанды интеллект ел мүддесіне қызмет етіп, руханиятқа зиян келтірмеуі керек», – деді ол.
Қасым-Жомарт Тоқаев жасанды интеллектінің мүмкіндіктерімен қатар оның шектеулеріне де тоқталды. Оның айтуынша, ЖИ кейде үстірт немесе қате ақпарат беруі ықтимал. «Жасанды интеллект тек көмекші құрал бола алады. Ал білімнің сапасы мен тәрбиелік маңызын қамтамасыз ететін – адам. Мұғалім – сапалы білімнің басты кепілі», – деп түйіндеді Мемлекет басшысы.
