Халықаралық қарттар күніне орай Талдықорған қаласында Абай атындағы №1 мектеп-гимназиясында «Көп жасаған қария, ақылы терең дария» атты тағылымы мол кеш өтті.
Жиын барысында мектеп директоры қазыналы қарттарға жылы лебізін білдіріп, жүрек жарды тілегін арнады. Жас өнерпаздар ән айтып, өлең оқып, өнерлерін паш етті. Кештің шырайын кіргізген ерекше сәттердің бірі – Талдықорған әуендері ансамблінің өнері болды. Ансамбль әншісі Мақсат Төлеу әуезді әнімен үлкендерге жастық шақтың тәтті естеліктерін сыйлады. Әуезді әуенге ілескен ақсақалдар мен ұстаздар ортада вальс билеп, сахнаның сәнін келтірді. Бұл көрініс жас ұрпаққа өнегелі үлгі болды.
Кеш соңында ардагер Марат Оразұлы батасын беріп, оқушыларға ақжарма тілегін жеткізді.
Ұйымдастырушысылардың бірі, мектеп ұстазы Қуат Нұрғалиұлы Ешпаев:
«Біздің негізгі мақсатымыз – патриоттық бағыттағы адал ұрпақты тәрбиелеу. Сол себепті 1 қазан – Қарттар күніне арналған іс-шарада оқушыларымызды үлкенді сыйлауға, құрметтеуге шақырдық. Бүгінгі кешке 20-дан астам қария қонаққа келді. Бұл кісілер – мектебімізде ұстаздық еткен ардақты зейнеткерлер. Оларға арнап жыл сайын осындай шара ұйымдастырылады», – деді.
Абай атындағы №1 мектеп-гимназияда өткен мерекелік кеш – қарттарға құрметтің, ұрпақ сабақтастығының, ұлттық тәрбиенің айқын көрінісі болды. «Қариясы бар ел – қазыналы ел» деген дана сөздің мәнін ұғындырған тағылымды шара қонақтарға шаттық сыйлап, ұмытылмас әсер қалдырды.
Жұлдыз Кентбаева,
Жу студенті
