Бүгін, 7 қазанда, Қазақстанның 12 облысында ауа райының қолайсыздығына байланысты дауылды ескерту жарияланды, – деп хабарлайды 7-su.kz ақпараттық порталы «Қазгидромет» РМК-ға сілтеме жасап.
Синоптиктердің дерегіне сәйкес, еліміздің бірқатар өңірлерінде тұман, аяз, екпінді жел және өрт қаупінің жоғары деңгейі байқалады.
Ақмола облысында түнде және таңертең батыс пен солтүстік аудандарда тұман түседі.
Ақтөбе мен Атырау облыстарында өрт қаупі жоғары және төтенше деңгейде сақталып отыр.
Жамбыл облысының таулы аймақтарында тұман түсіп, желдің жылдамдығы 15–20 м/с-қа дейін күшейеді. Түнде 1–3° аяз байқалады.
Жетісу облысында түнгі уақытта 1–6° аяз болып, Алакөл маңында желдің екпіні 20 м/с-қа дейін жетеді.
Батыс Қазақстан, Маңғыстау және Ұлытау облыстарында өрт қаупі жоғары деңгейде сақталуда.
Қостанай мен Солтүстік Қазақстан облыстарында түнде және таңертең тұман түседі.
Қызылорда облысында күндіз шаңды дауыл тұрып, желдің күші 15–20 м/с-қа дейін жетеді.
Түркістан облысында таулы асуларда жел күшейіп, өңірдің кей жерлерінде төтенше өрт қаупі сақталады.
