Қазақстан Президенті Қасым-Жомарт Тоқаев Газа секторындағы қақтығысты тоқтату және тұтқынға алынған адамдарды босату жөніндегі келісімді қолдайтынын мәлімдеді. Бұл туралы Мемлекет басшысының көмекшісі – баспасөз хатшысы Руслан Желдібай хабарлады, – деп жазады 7-su.kz ақпараттық порталы.
Мысырда өткен жанама келіссөздер нәтижесінде тараптар Газа секторындағы қақтығысты тоқтату және тұтқындарды босату туралы келісімге келген. Президент Тоқаев бұл бастаманы қолдап, араағайындық жасаған елдердің рөлін ерекше атап өтті.
Мемлекет басшысы Мысыр, Қатар, Түркия елдерінің араағайындық қызметінің табысты болғанын, сондай-ақ Таяу Шығыста бейбітшілік орнату жөніндегі келіссөздерге президент Дональд Трамп бастаған АҚШ тарапының ерекше үлес қосқанын атап өтті, – делінген хабарламада.
Еске сала кетейік, бұған дейін де Қазақстан АҚШ президенті Дональд Трамптың Газа секторындағы қақтығысты тоқтатуға бағытталған жан-жақты бітімгерлік жоспарын қолдайтынын мәлімдеген болатын.
Қазақстан жаһандық және аймақтық қауіпсіздік мәселелерінде бейбіт бастамаларды қолдауды жалғастырып келеді. Мемлекет басшысының бұл мәлімдемесі елдің сыртқы саясаттағы бейбітсүйгіш бағытының дәлелі болып отыр.
