Премьер-министр Олжас Бектеновтің төрағалығымен өткен Үкімет отырысында еліміздің 2025 жылғы қаңтар–қыркүйек айларындағы әлеуметтік-экономикалық даму қорытындылары мен республикалық бюджеттің атқарылу барысы қаралды, – деп хабарлайды 7-su.kz ақпараттық порталы.
Премьер-министрдің айтуынша, Мемлекет басшысы Қасым-Жомарт Тоқаев өткен аптада экономикалық даму сапасын арттыру мәселелері бойынша өткізген кеңесте макроэкономикалық тұрақтылықты нығайту, инфляцияны төмендету және азаматтардың әл-ауқатын арттыру жөнінде нақты тапсырмалар берген.
– Президент халықтың табысын жақсартуда саннан сапаға көшу маңызды екенін атап өтті, – деді Олжас Бектенов.
Үкіметтің баспасөз қызметінің мәліметінше, Ұлттық экономика вице-министрі Азамат Әмрин отырыс барысында биылғы 9 айдың қорытындысы бойынша ел экономикасының өсімі 6,3 пайызды құрағанын мәлімдеді.
Оның ішінде:
-
нақты сектордағы өсім – 8,1%,
-
қызметтер өндірісі – 5,3%,
-
көлік қызметтері – 21,2%,
-
құрылыс – 14,9%,
-
тау-кен өнеркәсібі – 9,3% деңгейінде артқан.
Сонымен қатар сауда көлемі 8,8%-ға, өңдеу өнеркәсібі 6,2%-ға, ауыл шаруашылығы 4,4%-ға өскен.
– Жалпы ішкі өнім өсімінің 70 пайыздан астамын өнеркәсіп, сауда және көлік салалары қамтамасыз етті, – деді вице-министр.
Сондай-ақ негізгі капиталға салынған инвестициялар 13,5 пайызға өсіп, көлемі 13,8 трлн теңгеге жеткені атап өтілді.
