Бүгін Мемлекет басшысы Қасым-Жомарт Тоқаев Парламенттік реформа бойынша Жұмыс тобының алғашқы отырысына қатысты, – деп хабарлайды 7-su.kz ақпараттық порталы.
Президенттің айтуынша, өткен аптада арнайы Жұмыс тобын құру туралы Өкімге қол қойылған. Бұл бастама – еліміздің саяси жүйесін жетілдіруге бағытталған маңызды әрі жауапты қадам.
– Парламенттік реформа – еліміздің алдында тұрған аса маңызды, жауапты жұмыс. Жолдауымда бұл мәселе азаматтық секторда, сарапшылар ортасында және қазіргі Парламентте жан-жақты талқылануы қажет деп нақты айттым, – деді Қасым-Жомарт Тоқаев.
Отырыста Парламент, Президент Әкімшілігі, Үкімет және саяси партиялар өкілдерімен қатар, заңгерлер, ғалымдар мен қоғам қайраткерлері қатысты. Мемлекет басшысы олардың барлығы елге танымал, өз саласында тәжірибелі мамандар екенін атап өтті.
– Парламенттік реформа – халқымыздың тағдырына тікелей қатысы бар мәселе. Жұмыс тобының әр мүшесі осы тарихи міндетті дұрыс түсініп, белсенді жұмыс істейді деп сенемін, – деді Президент.
Айта кетейік, Жұмыс тобының негізгі мақсаты – елдегі заң шығару жүйесін жетілдіру және Парламент қызметінің тиімділігін арттыру бағытында ұсыныстар әзірлеу.
