Вице-премьер – ұлттық экономика министрі Серік Жұманғарин мен Президент әкімшілігі басшысының орынбасары Ерболат Досаев Вашингтонда америкалық Honeywell компаниясының аға вице-президенті Стейси Бернардспен кездесті.
Қазақстандық тарап өзара ынтымақтастықтағы оң серпінді атап өтіп, Honeywell-ге Қазақстанмен мүдделі ұзақмерзімді әріптестікке деген ниеті үшін алғыс білдірді. Аэроғарыштық технология, өнеркәсіптік автоматтандыру және жаңа материалдар жасау саласында әлемдік көшбасшы саналатын компания Қазақстанда 1998 жылдан бері 500-ден аса жобаны жүзеге асырған.
Ерболат Досаев Қазақстанның анағұрлым әртараптандырылған, экологиялық және технологиялық экономиканы қалыптастыруға бағытталған ауқымды экономикалық трансформацияны бастан кешіп жатқанын атап өтті. Осыған байланысты ел Honeywell өндірісін локализациялап, одан әрі кеңейтуге және заманауи технологияларды енгізуге мүдделі.
Ол компанияға Қазақстанда Орталық Азия, Кавказ, Әзербайжан және аймақтағы басқа мемлекеттерге қызмет көрсете алатын аймақтық хаб құру мүмкіндігін қарастыруды ұсынды.
Қазақстандық тарап Honeywell-дің қатысуын кеңейту үшін бірнеше әлеуетті бағытты белгіледі. Олар – өнеркәсіптік қауіпсіздік пен мониторингтік мақсатта қолдану үшін Honeywell жүйелерін дамыту, қалдықтарды азайту және энергия үнемдеу саласындағы ұлттық мақсаттарға сай жобаларды іске асыру.
Кездесуде, сондай-ақ, еліміздің мұнай-газ нысандарындағы технологиялық үдерістерді басқару жүйесіне жасанды интеллект шешімдерін енгізу туралы Honeywell ұсынысы талқыланды. Бұл қадам өндірістің тиімділігін, қауіпсіздігі мен сенімділігін арттыруға, процестерді оңтайландыру мен шығындарды азайтуға мүмкіндік береді.
Анықтама:
Honeywell – аэроғарыштық технологиялар, өнеркәсіптік автоматтандыру және инновациялық материалдар өндіру саласындағы әлемдік көшбасшы. Компанияның жылдық айналымы шамамен $35 млрд, ал Қазақстандағы бизнес көлемі $100 млн шамасында.
Қазақстанда Honeywell 1998 жылдан бері жұмыс істейді. Бүгінде Астана, Алматы, Атырау және Ақсай қалаларында кеңселері бар. Компания 500-ден аса жобаны жүзеге асырған, 100-ден астам қызметкері бар, оның 60-тан астамы – қазақстандық инженерлер. Honeywell шешімдері ҚМГ, ТШО, КПО, КТО және ҚазМинералс секілді ірі кәсіпорындарда қолданылады. Сондай-ақ, компания маңызды инфрақұрылым нысандарының киберқауіпсіздігін қамтамасыз етеді.
«Жетісу-Ақпарат»
