– 15 тамыздан бастап биылғы қысқы жылыту маусымындағы тұрғындардың қауіпсіздігін қамтамасыз ету мақсатында құтқару қызметінің мамандары, полиция қызметкерлері және жергілікті атқарушы органдардың өкілдері әлеуметтік осал топтағы отбасыларды аралап, түсіндіру жұмысын жүргізіп келеді. Солардың арасындағы көмек керек отбасылардың мұржаларын тазалап, датчиктер орнату қолға алынуда. Бүгін «Қызылтас» саяжайындағы 4 отбасына осындай көмек көрсетілді, – дейді облыстық төтенше жағдайлар департаменті мемлекеттік өрт бақылау басқармасының аға инженері, азаматтық қорғау каптитаны Еламан Әубәкіров.
Улы газдың қауіпті шоғырын анықтайтын арнайы датчиктерді орнату жұмыстары жалғасып жатыр. Жергілікті атқарушы органдармен бірлесіп 2045 құрылғы сатып алу мәселесі шешімін тапқан. Қазіргі таңда 1 720 датчик алынып, облыс бойынша оның 820-сы орнатылған.
– Жыл сайын жылыту маусымы басталғанда төтенше жағдайлар департаментінің мамандары үйімізге келіп, жылыту жүйелерін тексеріп, өрт қауіпсіздігі туралы түсіндіреді. Міне, биыл мұржамызды тазалап, улы газды анықтайтын датчиктер орнатып беріп жатыр. Осы жұмыстардың берекесін берсін, – дейді зейнеткер «Қызылтас» саяжайының тұрғыны Кәкима Оразбаева.
Жылыту маусымы басталғалы бері департамент мамандары 979 жиын, 6 брифинг өткізіліп, 560 нұсқаулық таратыпты. Осы іс-шараларға 21468 адам қамтылған. Сондай-ақ, өрт сөндіру бөлімдерінде 103 экскурсия ұйымдастырылып, оған 2499 тұрғын тартылған. Өрт қауіпсіздігіне арналған сенбіліктер жоспары бекітіліп, шаралар күн сайын демалыссыз өтуде.
Айта кетерлігі, облыстық төтенше жағдайлар департаменті халықтың хабардарлығын арттыру мақсатында бұқаралық ақпарат құралдарымен белсенді жұмыс жүргізуде. Өздерінің әлеуметтік желілерінде бейнероликтер мен ескерту хабарламаларын тұрақты түрде жариялап келеді.
Атқарылған профилактикалық жұмыстың нәтижесінде жылыту маусымы басталғаннан бері өрт оқиғасының саны 2,2 есеге азайған.
Жалпы жылыту маусымы кезіндегі өрттің алдын алу бағытындағы жұмыс облыстық төтенше жағдайлар департаментінің тұрақты бақылауында және маусым соңына дейін жалғасады.
Қажет АНДАС
