Ыңғайлы әрі қауіпсіз цифрлық орта қалыптастыру мақсатында барлық мемлекеттік мобильді сервис SuperApp қағидаты бойынша eGov және Aitu экожүйелеріне кезең-кезеңімен біріктіріледі. Бұл туралы Үкіметтің баспасөз қызметі мәлімдеді, – деп хабарлайды 7-su.kz ақпараттық порталы.
Мәліметке сәйкес, интеграция мобильді қосымшалардың бытыраңқылығын жойып, үдерістерді жеделдетуге және халыққа көрсетілетін мемлекеттік қызметтердің сапасын арттыруға мүмкіндік береді.
Премьер-министр Олжас Бектеновтің төрағалығымен өткен цифрлық штаб отырысында бірқатар өзекті мәселе қаралды.
«Цифрлық штаб шешімімен мемлекеттік органдарға Astana Hub IT-стартаптар технопаркі қызметінің басым түрлерінің тізіміне мультимедиа, ойын дизайнын әзірлеу мен басып шығару, бағдарламалық қамтамасыз етуді енгізу, сүйемелдеу және түрлендіру, сондай-ақ киберспорт саласындағы қызметтер сияқты бағыттарды қосу тапсырылды», – делінген хабарламада.
