Жамбыл облысының намысын қорғап жүрген боксшы Әйгерім Сәттібаева бокстан Қазақстан чемпионатының финалына жолдама алды, деп хабарлайды 7-su.kz ақпарттық порталы smartnews.kz сайтына сілтеме жасап.
Бұл туралы журналист Аслан Каженов жазды.
«Көп жылғы еңбегім ақталды – мен финалдамын. Бұл салмақта (48 келіге дейін) бәсеке өте ауыр. Бұрын осы санатта Назым Қызайбай үш мәрте әлем чемпионы атанған, сондықтан әр жекпе-жек оңайға соқпайды. Бірақ біз жеңіске жетіп келеміз», – деді спортшы.
Әйгерім соңғы рет Қазақстан чемпионатын 2015 жылы Қызылордада ұтқан. Содан бері алғаш рет финалға дейін жетіп отыр.
«Құдай қаласа, ертең финалда жеңіс бұйырса, өте қуанышты болар едім. Бәрін уақыт көрсетеді», – деп қосты ол.
48 келіге дейінгі салмақ дәрежесінде Сәттібаева қызылордалық Ақтоты Болатты жеңіп, кем дегенде күміс жүлдені қоржынына салды. Айта кетейік, Әйгерім Сәттібаева – бес баланың анасы.
