Текелі қаласында денсаулық сақтау саласының дамуына серпін беретін маңызды нысан – «Жедел жәрдемге» арналған блокты-модульді кешеннің ашылу салтанаты өтті.
Кешен заманауи талаптарға сай жабдықталып, медициналық персоналдың тиімді жұмыс істеуіне және тұрғындарға қолайлы жағдай жасауға бағытталған.
Ашылу рәсімінде сөз алған Текелі қаласының әкімі Алмас Әділ жиналғандарды келе жатқан Республика күнімен құттықтап, жаңа нысанның маңыздылығын атап өтті:
– Бүгін халықтың амандығы үшін «Жедел жәрдем» стансысын ашып отырмыз. Бұл – тұрғындарға шұғыл көмек көрсету сапасын арттыруға бағытталған игі қадам. Қиын да жауапты еңбектеріңізге сәттілік тілеймін, – деді.
Облыстық «Жедел жәрдем» стансысының директоры Савелий Пак жаңа кешеннің құрылысына қолдау көрсеткен әкімдікке ризашылығын білдіріп:
– Медицина саласына жасалып жатқан мұндай қамқорлық – әрбір фельдшер мен дәрігерге үлкен күш береді. Ең бастысы – сырқаттарды баратын жеріне аман жеткізу, – деді.
Іс-шара барысында жиналғандарға кешеннің материалдық-техникалық базасы таныстырылып, «Жедел жәрдем» қызметінің жұмысы көрсетілді. Жаңа ғимаратта демалыс бөлмелері, кезекші дәрігерлерге арналған кеңсе, санитарлық көліктерге арналған жылы бокстар және медициналық құрал-жабдықтар қоймасы бар.
Мамандардың айтуынша, бұл жоба аймақтық медициналық инфрақұрылымды жаңғырту бағдарламасы аясында жүзеге асқан. Кешеннің іске қосылуы Текелі қаласы мен оған жақын елді мекендер тұрғындарына шұғыл көмек көрсетуді айтарлықтай жақсартады.
Гүлжан ТҰРСЫН
Текелі қаласы
