Қала келбеті – тұрғын мәдениетінің айнасы. Осы орайда елімізде жарияланған «Таза Қазақстан» экологиялық акциясы аясында Талдықорған қаласында жалпықалалық сенбілік өтті. Табиғатты аялау мен туған жерді көркейтуге бағытталған игі шараға жүздеген еңбек ұжымы атсалысты.
Аталған шарадан «Талдықорған электр жүйелері» АҚ (ТАЭТК) ұжымы да шет қалмады. Компания қызметкерлері қаладағы Абылайхан көшесі бойындағы теміржол маңын қоқыстан арылтып, айналаны ретке келтіруге белсене кірісті. Бір күннің ішінде шөп-шалам, сынған бұтақтар мен қалдықтар тазартылып, аймақтың ажары айқындала түсті.
Таза еңбек пен ұйымшылдықтың нәтижесінде шаһар көркі жаңарып, тұрғындарға көтеріңкі көңіл-күй сыйлады. Сенбілікке 300-ге жуық жұмысшы қатысып, үш бірлік техника жұмылдырылды. Әрбір адамның туған қаласына деген сүйіспеншілігі мен жауапкершілігі көрініс тапқан бұл іс-шара көпшілікке үлгі болды.
Табиғатты қорғау мен экологиялық мәдениетті қалыптастыру – уақыт талабы. Сол себепті, мұндай сенбіліктердің мәні тек тазалықпен шектелмейді, ол – ұжымдық белсенділік пен ортақ игілікке бағытталған азаматтық ұстанымның көрінісі.
Нұржамал АБЕУОВА,
ТАЭТК АҚ-ның баспасөз хатшысы
