Орта салмақтағы қазақстандық боксшы, әлем чемпионы Жәнібек Әлімханұлы 6 желтоқсан күні кубалық Эрисланди Ларамен жекпе-жекке шығады, – деп хабарлайды 7-su.kz ақпараттық порталы.
Top Rank компаниясы Жәнібек Әлімханұлының келесі айқасына қатысты ресми мәлімдеме жасады. Жекпе-жек АҚШ-тың Техас штатындағы Сан-Антонио қаласында орналасқан Frost Bank Center аренасында өтеді. Бұл кездесу WBA, IBF және WBO тұжырымдары бойынша чемпиондық белбеулерді біріктіретін маңызды айқас болмақ.
Жәнібек үшін бұл – PPV жүйесіндегі алғашқы дебюті. Егер ол жеңіске жетсе, үш чемпиондық белбеуді біріктірген тұңғыш қазақстандық боксшы атанады.
Кештің басты бәсекесінде мексикалық Айзек Крус пен америкалық Ламонт Роуч WBC тұжырымы бойынша уақытша әлем чемпионы атағын сарапқа салады.
42 жастағы кубалық Эрисланди Лара кәсіби мансабында 37 жекпе-жек өткізіп, оның 31-де жеңіске жеткен, 3 рет жеңіліп, тағы 3 мәрте тең түскен. Ал қазақстандық чемпион Жәнібек Әлімханұлы 17 жекпе-жектің барлығында жеңіске жетіп, 12-сін нокаутпен аяқтаған.
Айта кетейік, Әлімханұлы соңғы айқасында француз Анауэль Нгамиссенгені бесінші раундта нокаутқа жіберіп, өз белбеуін сәтті қорғаған болатын.
