Қызылорда облысының әкімі Нұрлыбек Нәлібаев Мемлекет басшысына өңірдің әлеуметтік-экономикалық дамуы жөнінде есеп берді, – деп хабарлайды 7-su.kz ақпараттық порталы.
Президентке Қызылорда облысындағы инвестициялық жобалардың жүзеге асырылуы, «Таза Қазақстан» экологиялық бағдарламасы аясында атқарылған жұмыстар, сондай-ақ облыс орталығы мен елді мекендерді абаттандыру шаралары туралы мәлімет берілді.
Нұрлыбек Нәлібаевтың айтуынша, соңғы төрт жылда өңір экономикасына тартылған инвестиция көлемі 233 пайызға артқан. Биыл 720 миллиард теңгеден астам қаражат тарту жоспарланып отыр, оның 70 пайызы – жеке инвестиция.
«Экономиканы әртараптандыру мақсатында алдағы үш жылда аймақта жалпы құны 2 триллион теңгеге жуық 90 инвестициялық жоба іске асырылады. Бұл 11 мыңнан астам жаңа жұмыс орнын ашуға мүмкіндік береді. Биыл жалпы құны 302 миллиард 500 миллион теңге болатын 27 нысанды пайдалануға беру жоспарланған, бүгінде оның тоғызы іске қосылды», – деді облыс әкімі.
Мемлекет басшысы өңірдің әлеуметтік-экономикалық даму қарқынын атап өтіп, жүзеге асырылған жұмыстарға оң бағасын берді.
