Мемлекет басшысы Қасым-Жомарт Тоқаев Өнер орталығына барып, көрермен залы мен облыстық симфониялық оркестрдің дайындығын тамашалады.
Мың орындық көпфункционалды Өнер орталығы өткен жылы пайдалануға берілген. Заманауи үлгіде салынған кең ғимараттың құрылысына 3,7 миллиард теңге жұмсалған. Мұнда концерттер, шығармашылық кештер және түрлі қоғамдық іс-шаралар өткізіледі. Сондай-ақ бірнеше жергілікті шығармашылық ұжым осы орталықта жұмыс істейді.
Президентке 2022 жылдан бері өңірде 18 мәдениет нысаны ашылғаны туралы ақпарат берілді. Олардың қатарында 7 заманауи «Руханият» орталығы, музыкалық колледждің жаңа ғимараты, облыстық тарихи-өлкетану музейі және шалғай елді мекендерде салынған мәдениет үйлері бар.
Облыс әкімдігі мәдениет саласы қызметкерлерін баспанамен қамту, олардың біліктілігін арттыру және үздік тәжірибелерді енгізу бағытында жүйелі жұмыс жүргізіп келеді.
