Қазақстандықтар онлайн-петицияға қол қою жүйесін жеңілдетуді сұрап отыр, – деп хабарлайды 7-su.kz ақпараттық порталы.
Еpetition.kz сайтында азаматтар дауыс беру тәсілін өзгерту жөнінде петиция жариялады. Онда тұрғындар петицияға қол қоюды eGov Mobile қосымшасы арқылы, яғни компьютер мен электрондық цифрлық қолтаңбасыз жүзеге асыруды ұсынған.
Петиция авторы Жанар Бекербаеваның айтуынша, қазіргі жүйе көптеген азаматтарға қолайсыз.
– Қазір петицияға дауыс беру үшін компьютер мен электрондық цифрлық қолтаңба қажет. Бұл әсіресе қарт адамдарға, ауыл тұрғындарына және жол үстінде жүрген азаматтарға қиындық тудырады. Петицияға қол қоюды қолжетімді ету маңызды, – деді ол.
Автордың сөзінше, жүйені PIN, Face ID немесе Touch ID арқылы растау мүмкіндігін енгізу қажет. Бұл әдіс eGov Mobile-дағы өзге мемлекеттік қызметтерде сәтті қолданылып жүр.
– Мұндай жаңашылдық азаматтардың шешім қабылдауға қатысуын арттырып, билікке деген сенімді күшейтеді, – деп түйіндеді Жанар Бекербаева.
