Жетісу облысының орталығында «ASMARMED» көпсалалы медициналық орталығы ашылды. Жаңа емхананың ашылу салтанатына әр саланың басшыларымен бірге Талдықорған қаласының әкімі Ернат Бәзіл қатысып, аймақ тұрғындарын жүрекжарды қуанышымен құттықтады.
Жиналған қауым алдында сөз алған шаһар басшысы қашанда адам денсаулығы бәрінен маңызды екенін айрықша атап өтіп, бұл орталықтың науқастар үшін атқаратын рөлі зор екенін жеткізді.
– Бүгін Талдықорғанның медицина саласы үшін аса қуанышты күн. Өйткені «ASMARMED» заманауи медициналық орталығының ашылуы тұрғындарға сапалы әрі қолжетімді медициналық көмек көрсету жолындағы маңызды қадам. Сондай-ақ орталықтың іске қосылуы қалаға 1,1 миллиард теңге инвестиция тартумен бірге 150 жаңа жұмыс орнын ашуға мүмкіндік беруде. Болашақта бұл мекеме қала халқының өмір сапасын арттыруға өз үлесін қосатынына сенімдімін, – деді қала әкімі.
Жауаптылардың сөзінше, бүгінде Талдықорған қаласы бойынша 60-тан астам мемлекеттік және жекеменшік медициналық мекеме бар. Ал жаңадан ашылған көпсалалы бұл орталық заманауи медициналық құрал-жабдықтармен толық қамтамасыз етілген. Ғимаратта зерттеу кабинеттері, клиникалық зертханалар, физиотерапия және емдік дене шынықтыру бөлмелері жұмыс істейді. Жалпы, орталық үш негізгі блоктан тұрады. Әрі тәулік бойы, күндізгі және реанимациялық көмек көрсетуге арналған 40 төсек-орындық стационар дайындалған. Сонымен қатар тәулігіне 100-ге дейін науқасты қабылдап, қызмет көрсетуге қауқарлы.
Алдағы уақытта орталық өңір тұрғындарына жоғары деңгейдегі диагностика, ем және оңалту қызметтерін ұсынуды жоспарлап отыр.
Айдын КӘЛІМХАН
