«Қазақстан барысы» турнирінің алғашқы жеңімпазы Ұлан Рысқұл Жетісу облысының Дене шынықтыру және спорт басқармасының басшысы болып тағайындалды. Бұл туралы басқарманың баспасөз қызметі мәлімдеді.
«Жетісу облысы әкімінің бұйрығымен Ұлан Рысқұл Жетісу облысының Дене шынықтыру және спорт басқармасының басшысы болып тағайындалды», – делінген ақпаратта.
Ұлан Рысқұл Жетісу облысының спорт басқармасын бұған дейін де басқарған еді. Бұл қызметке 2023 жылғы 16 наурызда тағайындалған болатын.
Ұлан Рысқұл 1986 жылы дүниеге келген, білімі жоғары.
Әл-Фараби атындағы Қазақ ұлттық университетін құқықтану, Д.А.Қонаев атындағы көлік және құқық гуманитарлық университетін қаржы, Аймақтық әлеуметтік-иновациялық университетін дене шынықтыру және спорт мамандықтары бойынша бітірген.
Еңбек жолын Астана қаласында Мәдениет, ақпарат және спорт министрлігі Спорт істері комитетінің «Ұлттық штаттық командалар және спорт резерві дирекциясы» РМҚК дзюдодан (ерлер) Қазақстан ұлттық штаттық командасының нұсқаушы-спортшысы болып бастаған.
Әр жылдарда Туризм және спорт министрлігінің Спорт және дене шынықтыру агенттігінің дзюдодан (ерлер) Қазақстан ұлттық штаттық командасының нұсқаушы-спортшысы, Bagueri Asia ЖШС менеджері, «Халықаралық «Qazaq kuresi» федерациясы» қауымдастық нысанындағы заңды тұлғалар бірлестігінің бас хатшысының кеңесшісі, бас хатшысы лауазымдарын атқарған.
Сондай-ақ Алматы облысының дене шынықтыру және спорт басқармасының «Іле ауданы балалар мен жасөспірімдер спорт мектебі» КММ директоры болған.
Естеріңізде болса, Ұлан Рысқұл «Қазақстан барысы» турнирінің тұңғыш жеңімпазы болған. Оның үстіне ол дзюдодан Қазақстанның үш дүркін чемпионы, Азияның екі дүркін чемпионы, Әлем кубогының күміс жүлдегері атанған спорт шебері.
Фото: gov.kz
