Мемлекет басшысы Қасым-Жомарт Тоқаев Ресей Федералды жиналысы Федерация кеңесінің төрайымы Валентина Матвиенкомен кездесті, – деп хабарлайды 7-su.kz ақпараттық порталы.
Кездесу барысында Президент бұл сапарын Қазақстан мен Ресей арасындағы сан қырлы ықпалдастықтың жаңа кезеңі ретінде бағалайтынын атап өтті.
– Бұл сапар елдеріміз арасындағы стратегиялық серіктестік пен одақтастық қатынастарды жаңа деңгейге көтеру тұрғысынан тарихи маңызға ие, – деді Қасым-Жомарт Тоқаев.
Мемлекет басшысы сондай-ақ Ресей Президенті Владимир Путинмен өткен келіссөздер туралы айтып, екі ел арасындағы ынтымақтастықтың негізгі бағыттарына тоқталды.
– Кеше Владимир Владимировичпен екі сағатқа жуық жүзбе-жүз отырып әңгімелестік. Көптеген мәселені, өзара ықпалдастықты және халықаралық ахуалды талқыладық, – деді Президент.
Кездесу барысында тараптар Қазақстан мен Ресей арасындағы парламентаралық байланыстарды нығайту, экономикалық және гуманитарлық серіктестікті дамыту мәселелерін талқылады.
