Мемлекет басшысы Қасым-Жомарт Тоқаев Ресей Федералды жиналысы Федерация кеңесінің төрайымы Валентина Матвиенкомен кездесті, – деп хабарлайды 7-su.kz ақпараттық порталы.
Кездесу барысында Валентина Матвиенко Мемлекет басшысына ілтипат білдіріп, Ресей тарапы Қазақстан Президентінің мемлекеттік сапарына ерекше мән беріп отырғанын атап өтті.
– Сіздің сапарыңызға өте үлкен дайындық жүргізілгенін білемін. Мазмұнды бағдарлама мен мемлекетаралық құжаттар пакеті әзірленді. Бүгін бұл құжаттарға мемлекеттер басшылары қол қояды. Аса құрметті Қасым-Жомарт Кемелұлы, сіздің “Российская газета” басылымындағы мақалаңызды мұқият оқып шықтым. Ресей–Қазақстан қатынастарына қатысты тұстарына алып-қосарым жоқ. Екі ел арасындағы ынтымақтастықтың тарихы, бүгіні және болашағы туралы өте терең ой айтылған, – деді Валентина Матвиенко.
Кездесуде Қасым-Жомарт Тоқаев пен Валентина Матвиенко сауда-экономикалық, мәдени-гуманитарлық және парламентаралық ынтымақтастықтың өзекті мәселелерін талқылады.
Тараптар жоғары деңгейде қол жеткізілген барлық келісімдерді заңнамалық тұрғыдан сапалы қолдау қажеттігін және Қазақстан мен Ресей парламенттерінің күш-жігерін үйлестірудің маңызын атап өтті.
