Қазақстан бойынша 2025 жылғы желтоқсаннан 2026 жылғы наурызға арналған ауа райының консультативтік болжамы белгілі болды, – деп хабарлайды 7-su.kz ақпараттық порталы.
«Қазгидромет» РМК ұзақ мерзімді ауа райы болжамы басқармасының басшысы Жұлдыз Исабекова мәлімдеді.
Алдын ала болжам бойынша республиканың басым бөлігінде қыс мезгілі қоңыржай жылы болады. Жауын-шашын мөлшері климаттық норма шамасында сақталады, бірақ кейбір кезеңдерде бұрқасын, екпінді жел, көктайғақ, тұман және мол жауын-шашын күтіледі. Желтоқсан айында ауа температурасы жиі ауытқып, жылы күндер мен суық аяздар кезектеседі.
Айлық орташа температуралар:
-
Республиканың басым бөлігінде – нормадан 1-2°С жоғары;
-
Оңтүстік-шығыс жартысында (Түркістан, Жамбыл, Алматы, Жетісу, Қарағанды, Абай, Қызылорда және Ұлытау облыстарының кейбір бөліктерінде) – норма шамасында.
Желтоқсан айындағы жауын-шашын:
-
Елдің басым бөлігінде – климаттық нормамен шамалас;
-
Қызылорда, Ақтөбе, Қостанай және Ұлытау облыстарының кей жерлерінде – нормадан төмен болуы мүмкін.
-
Бұрқасын, дауылды жел, көктайғақ, тұман және оңтүстік циклондардың әсерінен аралас жауын-шашын (қар мен жаңбыр) күтіледі.
Температуралық ерекшеліктер:
-
Бірінші онкүндіктің соңында Солтүстік, Шығыс және Орталық Қазақстанда түнде 23-28°С аяз, күндіз 13-18°С аяз болады;
-
Екінші және үшінші онкүндіктерде түнде 15-20°С аяздан 5-10°С аязға дейін, күндіз – 3°С аяздан 5-10°С аязға дейін ауытқиды;
-
Батыс пен оңтүстік аймақтарда айдың басында күндіз 5-10°С жылы, кейін түнде 0-5°С аязға дейін төмендейді.
Қаңтар айы:
-
Республиканың басым бөлігінде норма шамасында, шығысында – нормадан 1°С төмен;
-
Жауын-шашын республика аумағының басым бөлігінде норма шамасында, оңтүстік және таулы аймақтарда нормадан көп (Түркістан, Жамбыл, Алматы, Жетісу, Шығыс Қазақстан облыстарының таулы және тау бөктеріндегі аудандары).
Ақпан мен наурыз:
-
Қызылорда, Жамбыл, Алматы, Жетісу және Шығыс Қазақстан облыстарының таулы аймақтарында наурызда нормадан көп жауын-шашын күтіледі;
-
Жалпы ауа райы жылы болады.
«Қатты жауын-шашын, қардың еру кезеңдері мен аязды ауытқулар топырақта және қар жамылғысында мұз қабыршығының пайда болуына себеп болып, 2026 жылғы су тасқыны кезеңіне кері әсер етуі мүмкін», – деді «Қазгидромет» өкілі.
