Жетісу облысында полицейлер колледж студенттеріне цифрлық қауіпсіздік бойынша дәріс өткізді, – деп хабарлайды Polisia.kz.
«Заң мен тәртіп» тұжырымдамасын іске асыру аясында киберқылмысқа қарсы іс-қимыл басқармасының мамандары политехникалық колледж студенттеріне цифрлық қауіпсіздікке арналған профилактикалық дәріс ұйымдастырды. Іс-шараның мақсаты – буллинг пен кибербуллингтің алдын алу, жастар арасында цифрлық мәдениетті қалыптастыру және интернетте қауіпсіз әрекет ету дағдыларын нығайту.
Дәріс барысында мамандар буллингтің түрлері, оның психологиялық және құқықтық салдары туралы түсіндіріп, қауіп-қатерді ерте анықтау жолдарын көрсетті. Сонымен қатар мұндай жағдайларда қайда жүгінуге болатыны жөнінде кеңес берілді. Әсіресе әлеуметтік желілер мен мессенджерлер арқылы таралатын кибербуллинг – қорлау, қорқыту, намысқа тиетін ақпарат тарату сияқты заңға қайшы әрекеттерге ерекше көңіл бөлінді. Полицейлер интернеттегі кез келген агрессия қолданыстағы заңнама бойынша жауапкершілікке әкелетінін, оның зардабы жәбірленушіге де, құқық бұзушыға да ауыр әсер етуі мүмкін екенін атап өтті.
Профилактикалық кездесу студенттердің қызығушылығын тудырып, пікір алмасуға жағдай жасады. Олар мамандарға сұрақ қойып, өз тәжірибелерімен бөлісті. Полиция өкілдерінің айтуынша, қауіпсіз цифрлық ортаны қалыптастыру – қоғам, ата-ана, педагог және барлық интернет пайдаланушылардың ортақ міндеті. Осындай шаралар Жетісу облысының білім беру ұйымдарында алдағы уақытта да жалғасады.
