Облыстық табиғи монополиялар салаларындағы тариф қалыптастыру үдерісінің ашықтығын қамтамасыз ету мақсатында өңірлік комиссияның кезекті жиыны өтті.
ҚР Ұлттық экономика министрлігі Табиғи монополияларды реттеу комитетінің облыстық департаментінің бастамасымен ұйымдастырылған басқосуда 2026-2030 жылдарға арналған бірнеше кәсіпорынның тарифтік ұсыныстары қаралды. Оның ішінде «ТАЭТК» АҚ мен «Қаратал Транзит» ЖШС-нің электр энергиясын жеткізу және бөлу қызметтері, «Жетісу Су Құбыры» ҚМКК, «Текелі Су Құбыры» МКК және «Ақсу ЖСК» ЖШС-нің су беру мен ағын суларды бұру бағытындағы есептері талданды. Сондай-ақ, «Талдықорғанжылусервис» МКК-нің жылу өндіру, тарату және сату жөніндегі сметасы назарға ұсынылды.
Жиынға мәслихат депутаттары, мемлекеттік құрылымдардың өкілдері, жергілікті, Талдықорған қаласының Қоғамдық кеңесі мен табиғи монополиялар субъектілері қатысты. Қатысушылар әрбір тарифтік жобаға қатысты өз ұсыныстарын білдіріп, бірқатар нақты ескертулер жасады.
Департамент басшысы Думан Қалибеков тариф саясатының ашықтығын қамтамасыз ету тұрғындардың сенімін арттыруға қызмет ететінін атап өтті:
– Тариф – күнделікті тұрмысқа тікелей әсер ететін маңызды көрсеткіш. Сондықтан кез келген есеп пен шығын құрылымы толық түсінікті болуы тиіс. Барлық пікірлер мұқият зерделеніп, шешім қабылдау кезінде ескеріледі. Басты мақсат – тұрғындарға сапалы қызмет пен қолайлы бағаларды ұсыну, – деді.
Қорытындысында, комиссияға жолданған ұсыныстар толық сараптамадан өткізіліп, тиісті шешім қабылданатын болды. Мұндай ашық талқылаулар мемлекеттік органдар, табиғи монополиялар және тұтынушылар арасындағы тиімді диалогты күшейтеді.
Санжар СҰЛТАНҒАЗЫ
