АСҚАР ТАУ ӘКЕ – ЗЕРЕК БАЛА, ДАНА ЕНЕ – ДАРА КЕЛІН

Д. Рақышев атындағы облыстық филармония сахнасында отбасылық тәрбиені насихаттауға арналған «Дана ене – дара келін, Асқар тау әке – зерек бала» атты облыстық байқау өтті. Шараны «Азаматтық бастамаларды қолдау орталығы», облыстық қоғамдық даму басқармасы, «Жетісу жастары ұйымының Конгресі» ұйымдастырды.

Ұлттық тәрбие мен отбасылық құндылықтарды дәріптеу, ұрпақтар сабақтастығын насихаттау, жастарды үлкенге құрмет, кішіге ізет көрсетуге баулу мақсатында өткен шараға облыстың түкпір-түкпірінен келген өнерпаз отбасылар қатысты. Олар бірнеше кезең бойынша бақ сынады. Әр отбасы өзін таныстырып, «Өнерлі өрге жүзер» сахналық қойылым қойыа, отбасылық құндылықтарға қатысты қазылар алқасының сұрақтарына жауап беріп, үйден ұлттық тағам әзірлеп әкелу және таныстыру.

Байқау барысында қатысушы отбасылар тек өнерімен ғана емес, бір-біріне деген сыйластық, ынтымақ пен бірліктің озық үлгісін көрсетті. Әсіресе, бірнеше буын өкілдерінің бір сахнада жарасым табуы – көрермендерге ерекше әсер қалдырды.

Қазылар алқасы сайыстың әр кезеңін әділ бағалап, үздіктерді анықтады. Байқау нәтижесінде І орынды Қаратал ауданынан келген Аққайша Үркімбекова мен келіні Айгүл Үркімбекова жеңіп алды. Сарқан ауданынан келген Күнсая Жартыбаева және келіні Жансая Қалимолда ІІ орын иеленсе, Көксу ауданынан келген Майра Асубаева және келіні Балжан Нүсіп ІІІ орынды қанағат тұтты. Ал кербұлақтық Қалқабек Қамихан және келіні Қуаныш Хануға «Арнайы жүлде» тапсырылды.

«Асқар тау әке – зерек бала» байқауы бойынша Көксу ауданы Асқарбек Ақылбеков және АлиханЖұмағали І орын алса, Ақсу ауданынанБейбіт Танысбеков пен ұлы Мұқан Бейбарыс ІІ орынды иеленді. Панфиловтық Нұрбол Мейманчиев пен Алтынбек Ботанға ІІІ орын бұйырды.Ескелділік Салтанат Құмарханұлы менЕлжанға «Арнайы жүлде» тағайындалды.

«Асқар тау әке – зерек бала, дана ене – дара келін» отбасылық байланысты дәріптеген тағылымды шара өтті. Отбасылық берекені арттырып қана қоймай, жас ұрпақтың бойына ұлттық рух, имандылық пен ізгілік дәнін себуге арналған бұл байқау дәстүрлі түрде жалғасын тауып, өңірлік мәдени өмірдің жарқын үлгісіне айналмақ.