Қазақстанда денсаулық сақтау жүйесінде медициналық ұйымдарды, кадрлық ресурстарды, жабдықтар мен медициналық техниканы онлайн режимде есепке алуға мүмкіндік беретін ресурстарды басқарудың жаңғыртылған жүйесін енгізу басталды, – деп хабарлайды 7-su.kz ақпарттық порталы.
Жаңа жүйе жоспарлау сапасын арттыруға және адам факторынан туындайтын қателіктерді азайтуға бағытталған. Ол деректерді қолмен енгізу көлемін қысқартып, медициналық ұйымдардың ресурстарын басқаруды автоматтандыруға мүмкіндік береді.
Ақпараттық платформа ресурстарға деген қажеттілікті бес жылға дейінгі кезеңге болжауға, сондай-ақ мемлекеттік органдардың өзге де ақпараттық жүйелерімен интеграция арқылы медициналық ұйымдардың активтерін кешенді есепке алуға жол ашады.
Қазіргі уақытта жоба пилоттық режимде іске асырылып жатыр. Оған еліміздің барлық 20 өңіріндегі 672 медициналық ұйым қатысуда. Пилоттық кезең аяқталғаннан кейін ресурстарды басқару жүйесін ел аумағында кеңінен енгізу жоспарланып отыр.
