Премьер-Министрдің орынбасары – Мәдениет және ақпарат министрі Аида Балаева архив саласының мамандарын кәсіби мерекесімен құттықтап, бұл саланың мемлекеттік маңызына тоқталды, – деп хабарлайды 7-su.kz ақпараттық порталы Aikyn.kz сайтына сілтеме жасап.
Архив – стратегиялық ресурс
Министрдің айтуынша, қазіргі цифрлық заманда архив дереккөздері жай ғана құжаттар жиынтығы емес, ұлттық бірегейлікті қалыптастыратын негізгі күш. Бүгінде елімізде 236 мемлекеттік архив жұмыс істеп тұр. Ондағы қордың ауқымы таңғалдырады:
-
27,8 млн. сақтау бірлігі;
-
74 725 архив қоры;
-
3 млн.-нан астам электронды форматқа көшірілген іс.
Қолжетімділікті арттыру мақсатында биыл «Ұлттық цифрлық архив» порталын іске қосу бойынша Жол картасы бекітілді. Бұл құжаттарды музей және кітапхана материалдарымен бір жүйеге біріктіреді.
«Архив – 2025»: Жаһандық ізденіс
Қазақстанның тарихы тек өз елімізде ғана емес, шет елдерде де зерттеліп жатыр. «Архив – 2025» жобасының арқасында әлемнің 14 елінен (Германия, Түркия, Франция, Үндістан, Египет және т.б.) тарихымызға қатысты 7 мыңнан астам құнды құжат жиналды. Бұл жәдігерлер кезең-кезеңімен ғылыми айналымға еніп, тарихымызды түгендеуге септігін тигізеді.
Мамандарға қолдау және марапат
Мемлекет тарапынан архившілердің еңбегін лайықты бағалауға басымдық берілген. Министр атап өткендей, биыл сала қызметкерлерінің әлеуметтік жағдайы жақсара түсті:
-
Архив мамандарының орташа жалақысы 29%-ға өсті;
-
265 маман біліктілігін арттыру курстарынан өтті;
-
Үздік қызметкерлер «Құрмет» орденімен және «Архив саласының үздігі» төсбелгілерімен марапатталды.
«Қазіргі архив қызметкері – бұл IT маман, зерттеуші және реставратор құзыреттерін біріктірген әмбебап кәсіби маман», – деп түйіндеді Аида Балаева.
Кәсіби мереке қарсаңында барлық сала ардагерлері мен қызметкерлеріне қажырлы еңбектері үшін алғыс айтылды.
