Қазақстанда кәсіпкерлерді қолдаудың жаңа кезеңі басталды. Енді еліміздегі кәсіпорындар «Қазақстандық тауар өндірушілерінің тізілімі» атты арнайы цифрлық платформа арқылы өз мәртебесін онлайн растай алады, – деп хабарлайды 7-su.kz ақпараттық порталы Kazinform сайтына сілтеме жасап.
Жаңа e-ondiris.gov.kz платформасы бизнес иелері үшін бірнеше маңызды жеңілдіктер ұсынады. Ең бастысы – бюрократияның азаюы. Бұрын тауардың шығу тегін растау үшін талай есікті қағып, қағаз жинау керек болса, қазір барлық процесс цифрлық форматқа көшті. Өнеркәсіп және құрылыс министрі Ерсайын Нағаспаевтың мәлімдеуінше, жүйенің басты артықшылығы – оның толық ашықтығында. Бұл өтініш беруден бастап, оның мақұлдануына дейінгі әрбір қадамды интернет арқылы бақылауға мүмкіндік береді. Сонымен қатар мемлекет бұл қызметті ешқандай жеке аудиторлар мен ақылы сарапшылардың көмегінсіз, тегін көрсетеді. Жүйе басқа мемлекеттік базалармен интеграцияланғандықтан, көптеген құжатты қолмен өткізудің қажеті жоқ және бұл бизнеске түсетін әкімшілік жүктемені айтарлықтай төмендетеді.
Бұған дейін индустриялық сертификаты болған 1800-ден астам компания жаңа тізілімге автоматты түрде қосылды. Алайда бұл кәсіпорындар бір ай ішінде жүйеге кіріп, мәліметтерін толықтырып, ЭЦП арқылы өтінімін растауы тиіс. Қазірдің өзінде 1000-ға жуық компания платформаны белсенді қолдана бастады. Бұл қадам мемлекеттік қолдаудың нақты жұмыс істеп тұрған зауыт-фабрикалар мен кәсіпорындарға нысаналы түрде жетуін қамтамасыз етеді. Егер сіз де өндіруші болсаңыз, жаңа порталда тіркелу арқылы бизнесіңіздің ашықтығын көрсетіп, мемлекеттік бағдарламаларға қатысу мүмкіндігін арттыра аласыз.
