Талдықорған қаласына қарасты Өтенай ауылында бір ауысымда 100-ден астам науқасқа емдік қызмет көрсетуге арналған дәрігерлік амбулатория салынуда. Қазір 3 қабаттан тұратын медициналық нысанда құрылыс жұмыстары қарқынды.
Жауаптылардың сөзінше, халық саны 17 мыңға жуықтайтын Өтенай ауылына аймақтағы Еңбек, Мойнақ, Пригородный, Ынтымақ және Жастар-1, Жастар-2, Жастар-3 сынды бірнеше елдімекен қарайды. Осыған дейін ауыл тұрғындары 1986 жылы ірге тасы қаланған ескі ғимаратта ем қабылдап, жыл сайынғы қала әкімінің кездесуінде жаңа емхана салып беру туралы өз өтініштерін жеткізіп келген. Жұрттың талабы өткен жылы шаһар басшысы Ернат Бәзілдің қолдауымен оң шешімін тауып, жаңа емхана салына бастаған болатын. Қазір жол картасы аясында қолға алынған бұл әлеуметтік нысанның құрылыс жұмысы жергілікті депутаттар мен билік өкілдерінің қатаң қадағалауында.
– Ғимарат қолданысқа берілгенде дертіне дауа іздеген әрбір жан бұрынғыдай қалаға барып сабылмай-ақ, жақын жерден дауалануға мол мүмкіндік туады. Медициналық қызмет көрсету сапасын арттыру үшін емхана заман талабына сай қондырғылармен жабдықталып, білікті мамандармен толықтырылатын болады,– дейді сала басшылары.
Ал, аталған нысаннның бас мердігері – «Жаркент-Алғыр» ЖШС өз міндетін ойдағыдай атқарып, құрылыс алаңында 25 маман еңбек етуде. Жоспар бойынша олар амбулатория ғимаратын алдағы мамыр айында толық аяқтап, пайдалануға бермек.
Еске сала кетейік, Жетісу облыстық денсаулық сақтау басқармасының мәліметінше, биыл өңірде 88 медициналық нысан ашу жоспарланған. Соның 59-ы «Ауылдағы денсаулық сақтауды жаңғырту» бағдарламасы аясындағы дәрігерлік орталықтар болса, 20-сы блокты-модульді кешен, ал, 9-ы – жаңа құрылыс. Мәселен, өткен жылы облыс аумағында 26 емдеу орны іске қосылса, соның ішінде 24 медициналық және 1 фельдшерлік-акушерлік пункт, 250 келушіге арналған емхана пайдалануға берілген. Сондай-ақ, бүгінде өңірдегі денсаулық сақтау инфрақұрылымын жақсартумен қатар салаға кадрлар тартуға да көп көңіл бөлінуде. Атап айтсақ, былтыр қалалық және ауылдық жерлерге келген дәрігерлерге тиісінше 5 және 10 млн. теңге көлемінде бір реттік көтермеақы беру жүйесі республикада алғашқы болып Жетісуда енгізілген еді. Соның нәтижесінде 2024 жылы облыстың медициналық мекемелеріне жұмысқа келген 75 дәрігерге біржолғы көтерме ақы берілген. Бұл адамдардың 24-і ауылдық жерлерге, 51-і облыстағы қалалық медициналық мекемелерге жұмысқа келген. Олардың арасында жалпы практика дәрігерлері, хирург, анестезиолог-реаниматолог, акушер-гинеколог, педиатр, кардиолог, терапевт, иммунолог,травматолог, химиотерапевт, нарколог, психиатр, неонатолог, онколог, инфекционист, патологоанатом, рентгенолог, невропатолог, гематолог, нейрохирург, дерматовенеролог, УДЗ дәрігері, генетик сынды мамандық иелері бар.
Айдын КӘЛІМХАН
